২০২৫ চনৰ সাধাৰণ বাজেটৰ পূৰ্বে সংসদত দাখিল কৰা অৰ্থনৈতিক জৰীপে আল্ট্ৰা প্ৰচেছড ফুড (ইউ পি এফ)ৰ ব্যৱহাৰ বৃদ্ধিক লৈ উদ্বেগ প্ৰকাশ কৰিছে। সমীক্ষাটোত কোৱা হৈছে যে এই সমস্যাৰ মোকাবিলা কৰিবলৈ চৰকাৰে কঠোৰ এফ এছ এছ এ আই লেবেলিং নীতি, উচ্চ জি এছ টি হাৰ আৰু সজাগতা অভিযানৰ দৰে বহুমুখী ব্যৱস্থা গ্ৰহণ কৰিব লাগিব।
অৰ্থনৈতিক সমীক্ষাত কোৱা হৈছে যে ভাৰতত ইউ পি এফৰ ব্যৱহাৰ দ্ৰুতগতিত বৃদ্ধি পাইছে, যাৰ ফলত স্বাস্থ্যজনিত বিপদ বৃদ্ধি পাব পাৰে। এই খাদ্যসমূহত অত্যধিক পৰিমাণৰ চেনি, নিমখ, ঘনীভূত চৰ্বি আৰু কৃত্ৰিম সংযোজক পদাৰ্থ থাকে, যিবোৰ স্বাস্থ্যৰ বাবে ক্ষতিকাৰক হ’ব পাৰে। সমীক্ষাটোত কোৱা হৈছে যে এই সামগ্ৰীসমূহৰ ওপৰত বিভ্ৰান্তিকৰ পুষ্টিকৰ দাবী আৰু তথ্যৰ সৈতে মোকাবিলা কৰাৰ প্ৰয়োজন আছে।
ভাৰতীয় খাদ্য সুৰক্ষা আৰু মানদণ্ড কৰ্তৃপক্ষক ইউ পি এফৰ বাবে কঠোৰ লেবেলিং মানদণ্ড ৰূপায়ণৰ কথা চিন্তা কৰিবলৈ পৰামৰ্শ দিয়া হৈছে আৰু স্পষ্ট সংজ্ঞা আৰু নিয়মৰ অধীনত নিয়ন্ত্ৰণ কৰিবলৈ পৰামৰ্শ দিয়া হৈছে।
এই সমীক্ষাত ১৮ বছৰৰ তলৰ শিশুক ইউ পি এফৰ পৰা ৰক্ষা কৰিবলৈ কঠোৰ পদক্ষেপ লোৱাৰ পৰামৰ্শ দিয়া হৈছে। স্বাস্থ্য আৰু পৰিয়াল কল্যাণ মন্ত্ৰালয়ক বিজ্ঞাপন নিয়ন্ত্ৰণ কৰিবলৈ অনুৰোধ জনোৱা হৈছে।
প্ৰতিবেদনত কোৱা হৈছে যে ২২খন দেশৰ ওপৰত কৰা এক অধ্যয়নত স্পষ্ট হৈ পৰিছে যে খাদ্য সামগ্ৰীৰ ওপৰত আত্মনিয়ন্ত্ৰণ ফলপ্ৰসূ হোৱা নাই। এনে পৰিস্থিতিত ব্ৰেণ্ডেড সামগ্ৰীৰ ওপৰত কঠোৰ নিৰীক্ষণৰ দ্বাৰা গ্ৰাহকৰ আস্থা অধিক শক্তিশালী কৰিব পৰা যায়।
অৰ্থনৈতিক জৰীপে স্থানীয় আৰু বতৰৰ ফল-মূলৰ সেৱনক উৎসাহিত কৰিব লাগে বুলিও পৰামৰ্শ আগবঢ়াইছে। স্বাস্থ্যসন্মত খাদ্য যেনে গোটা শস্য, মোটা শস্য, ফল-মূল, শাক-পাচলি আদিৰ ওপৰত ইতিবাচক ৰাজসাহায্য প্ৰদানৰ প্ৰস্তাৱ দিয়া হৈছে, যাতে ইয়াৰ উপলব্ধতা আৰু ব্যৱহাৰ উন্নত হয়।
বিশেষকৈ শিশু আৰু যুৱক-যুৱতীক লক্ষ্য কৰি বিভ্ৰান্তিকৰ বিজ্ঞাপন আৰু আক্ৰমণাত্মক বিপণন কৌশলৰ ওপৰতো উদ্বেগ প্ৰকাশ কৰা হৈছে এই সমীক্ষাত। এই প্ৰত্যাহ্বানসমূহৰ সৈতে মোকাবিলা কৰিবলৈ চৰকাৰক গ্ৰাহক সুৰক্ষা ব্যৱস্থা শক্তিশালী কৰাৰ পৰামৰ্শ দিয়া হৈছে।
FIRST Business Portal addressing the potential of business capability of North East Region.
