আয়কৰদাতাক ডাঙৰ সকাহ দিলে বিত্তমন্ত্ৰী নিৰ্মলা সীতাৰমণে। বাজেট দাখিল কৰাৰ সময়ত তেওঁ ঘোষণা কৰে যে যদি কোনো ব্যক্তিয়ে প্ৰতিমাহে এক লাখ টকা উপাৰ্জন কৰে, তেন্তে তেওঁ এটকাও কৰ দিয়াৰ প্ৰয়োজন নাই। আচলতে নতুন টেক্স স্লেবত ১২.৭৫ লাখ টকা পৰ্যন্ত আয়ৰ ওপৰত কোনো কৰ নাথাকিব। ইয়াৰ উপৰিও বৃদ্ধ আৰু আই টি ৰিটাৰ্ণৰ সন্দৰ্ভতো ডাঙৰ ডাঙৰ ঘোষণা কৰা হৈছে।
অহা সপ্তাহত চৰকাৰে নতুন আয়কৰ বিধেয়ক আনিব, যাৰ ফলত কৰ ব্যৱস্থা অধিক সহজ আৰু স্বচ্ছ হৈ পৰিব। ইয়াৰ উপৰিও বাজেট দাখিল কৰাৰ সময়ত বিত্তমন্ত্ৰীগৰাকীয়ে কয় যে তেওঁ বীমা খণ্ডৰ বাবে প্ৰত্যক্ষ বিদেশী বিনিয়োগৰ সীমা বৃদ্ধি কৰিবলৈ ওলাইছে। চৰকাৰে ৭ টা শুল্কৰ হাৰ আঁতৰোৱাৰ সিদ্ধান্ত লৈছে। মাত্ৰ ৮ টা শুল্কৰ হাৰহে থাকিব। সমাজ কল্যাণৰ চাৰ্চাৰ্জ আঁতৰোৱাৰ প্ৰস্তাৱ দিয়া হৈছে।
ইয়াৰ লগতে কেন্সাৰ ৰোগীৰ বাবেও এটা ডাঙৰ ঘোষণা কৰা হ’ল। নিৰ্মলা সীতাৰমণে ঘোষণা কৰে যে ৩৬টা জীৱন ৰক্ষাকাৰী ঔষধৰ ওপৰত শুল্ক কৰ সম্পূৰ্ণৰূপে বিলুপ্ত কৰা হ’ব। সকলো চৰকাৰী চিকিৎসালয়তে কেন্সাৰ ডে কেয়াৰ চেণ্টাৰ নিৰ্মাণ কৰা হ’ব। কেন্সাৰ চিকিৎসাৰ ঔষধ সস্তা হ’ব। ৬টা জীৱন ৰক্ষাকাৰী ঔষধৰ কাষ্টম শুল্ক ৫%লৈ হ্ৰাস কৰা হ’ব।
এই নতুন গাঁথনিৰ মূল উদ্দেশ্য হৈছে মধ্যবিত্ত শ্ৰেণীক সকাহ দিয়া। যোৱা কেইবছৰমানৰ পৰা আয়কৰৰ ফলকত কোনো বিশেষ পৰিৱৰ্তন হোৱা নাছিল, যাৰ বাবে কৰদাতাসকলৰ মাজত হতাশাৰ সৃষ্টি হৈছিল। এতিয়া চৰকাৰে এই সমস্যা সমাধান কৰিছে, যাৰ ফলত নিয়োজিত আৰু মধ্য আয়ৰ গোটৰ লোকসকলক অধিক আৰ্থিক স্বাধীনতা দিয়া হ’ব।
FIRST Business Portal addressing the potential of business capability of North East Region.
