आमेरिकानि बिसायख'थिनि फिथाइ: भारतारि स्टक मार्केट, FII, रांखान्थिनि थाखाय डनाल्ड ट्राम्प देरहानायनि ओंथिया मा?

हाथाइ नायगिरिफोरा फोथायो दि ट्राम्पनि देरहानाया आमेरिकायाव खरसाखौ बांहोनो हागौ, जानो हागौ बेसेन बांनायखौ गोजौआव लाखिनो हागौ।

आमेरिकानि बिसायख'थिनि फिथाइया फ्राय जोबथा जाबाय, जेराव बारग' हादोरगिरि ड'नाल्ड ट्राम्पआ मावख'खौ दाबि खालामफिन्नो थियारि जादों। भारतारि रांखान्थि आरो नखरारि इकुइटि हाथाइफोरनि थाखाय बिथांनि देरहानायनि ओंथिया मा? हाथाइ नायगिरिफोरा फोथायो दि ट्राम्पनि देरहानाया आमेरिकायाव खरसाखौ बांहोनो हागौ, जानो हागौ बेसेन बांनायखौ गोजौआव लाखिनो हागौ। बेजों लोगोसे, मोनसे गोख्रोंसिन डलार आरो बांसिन फालांगियारि हेंथाफोरखौबो मिजिं थिनो हागौ।

इक्विरसनि रांखान्थिगिरि अनिता रंगनआ बुंदोंमोन, "सोर देरहायो बेनिख्रुइ बांसिन, मोनसे रोखा फिथाइया हाथाइफोरनि थाखाय मोनसे गोजोननाय मोनगोन, जाय फिथायनि इयुन रादाबाव मोनसे सोलायबाय थानाय मुडआव दं। बेयो भारतनि थाखाय मोजां राव सोलायनो हागौ मानोना आमेरिकाजों हादोरनि फालांगियारि सोमोन्दोआ गोख्रों जानानै दं। बुधबारनि सानजौफुआव बेंचमार्क इक्विटी इन्डेक्स बीएसई सेन्सेक्सआ 682 पइन्ट एबा 0.86 जौखोन्दो बांनानै 80,159 सिम सौहैदोंमोन।

रंगनआ बुंबावदोंमोन दि बिसायख'थिनि फिथायफोरनि सायाव रोखाथिया दावराव-दावसिखौ दबथायनानै आरो गुदि बाथ्रायाव गोसो होफिन्नानै हाथाइफोरखौ दिदोमथि खालामनायाव मदद होनो हागौ। मिजिंथिनाय दं दि बावैसो सिगां गुबुन हादोरारि फसंथानारि रां थिसनगिरिफोरजों (FII) गोबां बायजोआव बोहैनाया उलथायनो हमनो हागौ। 1 अक्ट'बर, 2024 मायथाइनिफ्राय गुबुन हादोरारि रां थिसनगिरिफोरा 1 लाख कौटि रांनि सेयारफोरखौ बायदों।

"भारतनि गुदि गोहोआ गोख्रों जानानै दं। बेनिखायनो थांनाय दानाव बायजोनिफ्राय ओंखारबोनायजों दैदेनजानाय सुद्रायनाय एबा गोरोबहोनाया उलथायनांगौ। गेजेरनिफ्राय गोलाव समगान्थियाव, आमेरिका आरो ड'नाल्ड ट्राम्प मोन्नैजोंबो भारतनि सोरजिलु सोमोन्दोनिफ्राय मोजां फिथाइ ओंखारनांगौ, "रंगनआ बुंदोंमोन दि आसा खालामनायनिख्रुइ लासै-लासै आमेरिकानि हार-खमायनाय चक्रनि फिथाय महरै भारतनि थाखाय रोखोमसे थौले हार-खमायनाय फारि जानो हागौ।

बेराफारसेथिं, क्लाइन्ट एसोसिएट्सनि इनभेस्टमेन्ट रिसार्च एन्ड एडभाइजरीनि सामलायगिरि नितिन अग्रवालआ बुंदोंमोन दि ट्राम्पनि दैदेन्नायाव मोनसे रिपब्लिकन दैदेननाय सोरखारा बांनाय खाजोना आरो गेजेर हायुंआरि फालांगियाव बांसिन रैखाथियारि नोजोरजों फालांगियारि गोहोखौ मख'जाथाव महर होनो हागौ।

सेन्टार फर मनिट'रिं इन्डियान इक'न'मि (CMIE) नि खारिनिफ्राय मिथिनो मोनो दि थांनाय जि बोसोराव आमेरिकायाव भारतनि दैथायहरनाया फ्राय नै गुन बांदों, जाय 77.53 बिलियन डलारसिम सौहैबाय।

आगरवालआ बुंबावदोंमोन दि ट्राम्पनि सिगांनि हादोरगिरिनि मोनसे गाहाय नोजोरा आमेरिकानि फालांगियारि खहाखौ बाङाय खालामनायमोन, जाय बायजोनिफ्राय लाबोनाय बेसेनखौ बांहोनायाव गोबाङैनो सोनारनाय खान्थिमोन। "भारतनि थाखाय, बेबादि खान्थि सोलायनायनि फिथाइया मोन्नै जानो हागौ। सेथियाव, फार्मासिउटिकेल आरो खौरां बिरोंदामिन बायदि सेक्टरफोरा जेंनाफोरजों मोगा-मोगि जानो हागौ। भारतारि जेनेरिक मुलि बानायग्राफोरा आमेरिकायाव दैथायहरनायाव बांनाय खाजोनाजों मोगा-मोगि जानो हागौ, जाय मुलि दारिमिनखौ गोहोम खोख्लैनो हागौ। बेबायदिनो, भारतनि आईटी सेक्टराव दाबियाव गोग्लैनाय नुनो मोननो हागौ, मानोना फालांगियारि दावहा आरो रांखान्थियारि गोग्लैनाया आमेरिकायाव गोनांथार खरसाखौ बाङाय खालामनो हागौ, "बिथाङा बेखेवनानै बुंदोंमोन दि बेसेन बांनायखौ होबथानो थाखाय आमेरिकानि सुद हारनि खमायनायाव गोबाव जानाया भारतआव गुबुन हादोरारि पर्टफ'लिअ' रां थिसननायखौ (FPI) लोरबां खालामनो हागौ।

ALSO READ: दिनै 06 नबेम्बर 2024 आव सना आरो रुफानि बेसेन: नोंथांनि सोहोराव दिनैनि सनानि बेसेनफोरखौ नाय।

आगरवालआ आरोबाव बुंदोंमोन दि US फेडारेल रिजार्भजों हार खमायनायाव गोबाव जानाया भारतनि राङारि खान्थियाव गोहोम खोख्लैनो हागौ। "भारतारि रिजार्भ बेंकआ सिगांनिफ्रायनो रांखान्थियारि जौगानायखौ लासै लासै मोगा-मोगि जानांनायलाय, हार खमायनायाव जायखिजाया गोबाव जानाया नखरारि बेसेन बांनायखौ सामलायनाय आरो रां थिसननायनि सानदांथिखौ गोख्रों खालामनायाव जेंनाफोरखौ बांहोनो हागौ," बिथाङा बुंदोंमोन।