त्रिपुरानि गिबि मन्थ्रि साहाया रां थिसनगिरिफोरखौ रायजोनि जौगानायनि खाबुखौ नायनो थाखाय खावलायदों

त्रिपुरानि गिबि मन्थ्रि मानिक साहआ रां थिसनगिरिफोरखौ त्रिपुरायाव मावथांखिफोर गायसन्नायनि सायाव साननो थाखाय हांख्रायहरदोंमोन आरो बिथांमोनखौ खोथा होदोंमोन दि रायजो सोरखारा गासैबो गोनां हेफाजाब होगोन।

समबारखालि मुम्बाइनि क'लाबायाव सा-सानजा फालांगि आरो रां थिसननाय र'ड श'खौ बिबुंथि होनानै, गिबि मन्थ्रि साहाया सा-सानजायाव रां थिसननाय आरो फालांगिनि खाबुफोरखौ बांहोनो थाखाय मोनसे प्लेटफर्म होनायनि थाखाय सा-सानजा ओनसोलनि जौगाथाय बिफान (MDoNER) नो साबायखर बावदोंमोन।

गिबि मन्थ्रिआ बेखौ नोजोर होदोंमोन दि DoNER मन्थ्रि बिफानखौ गथायनाया बे ओनसोलाव फालांगि आरो रां थिसननायनि खाबुफोरखौ दिन्थिफुंनायाव मख'जाथाव बिहोमा होदों।

"जारिमिनारि जाहोनफोरनि थाखाय, बे ओनसोला जौगानायनि गोबां बिथिंफोराव उनफिननानै दं," बिथाङा मख'दोंमोन।

"गाहाय मन्थ्रि नरेन्द्र मदिआ जेब्लाबो सा-सानजाखौ 'अष्टलक्ष्मी' मानियो आरो एक्ट ईस्ट पलिसिनि गेजेरजों बेनि जौगानायखौ गाहाय गोनांथि होयो। त्रिपुरा, गावनि रुजुजायै भुमखौरां आरो समाजारि-रांखान्थियारि नुथायजों, जौगानाय आरो खाबुनि चौराहायाव गसंना दं। त्रिपुराया हादोर आरो सा-सानजा ओनसोलाव बयनिख्रुइबो गोजोनसिन रायजो। बे रायजोआव मिथिंगायारि गेसनि गुवार बाख्रि दङ, जाय बेखौ मोब्लिबनि आग्लाय खालामो। त्रिपुरानि रांखान्थिया, गुबैयै आबाद आरो बेजों सोमोन्दो गोनां दारिमिनफोरनि सायाव बिथा खालामनानै, रायजोनि जौगानायखौ दैदेनगासिनो दं।

गिबि मन्थ्रि साहाया फोरमायदोंमोन दि 2024 मायथाइयाव रायजोनि अनुमानित साफ्रोमबो सुबुंनि आयआ 2023 मायथाइयाव 1.57 लाख रांनि रुजुनायाव 1.77 लाख रांनि बयनिख्रुइबो गोजौसिन।

"त्रिपुरानि GSDP आ 8.9 जौखोन्दोआव जौगादों, जाय बेखौ सा-सानजा ओनसोलाव नैथि बयनिख्रुइ बांसिन GSDP जौगानायनि हारजों रायजो बानायदों। जों रायजोनि गोहो आरो सम्फदफोरखौ बाहायनो थाखाय रां थिसनगिरि-लोगोआरि बारहावा सोरजिनो गासिबो नाजागासिनो दं। रायजो सोरखारा गासै रायजोआव दारिमिनारि आरो गुदि बिथायारि सानजथाइ जौगानायाव गोदान आयाम दाजाबदेरगासिनो दं। राजालामा, इन्टारनेट, रेलवे आरो एयारवेजनि सायाव नोजोर होनानै पि.एम. म'दिनि हीरा मडेलआ फोनांजाबनायखौ सोलायहोदों। महाराजा बीर बिक्रम (MBB) बिरखं गाथोनखौ जौगाहोनाय जादों, जाय बेखौ ओनसोलनि नैथि मुखुबसिन बिरखं गाथोन बानायदों," साहाया बुंदोंमोन।

बिथाङा आरोबाव मुंख'दोंमोन दि रायजो सोरखारा खोला जिल्लानि सिङाव थानाय साबरुमाव मोनसे जर'खा रांखान्थियारि ओनसोल (SEZ) गायसनदों, जाय सिगांनिफ्रायनो रां थिसनगिरिफोरनिफ्राय मख'जाथाव गोसो बोनो हादोंमोन।

"रबर, औवा, मिथिंगायारि गेस, आबाद-दिहुनथायफोर, आगर, जाग्रा आदार प्रसेसिं, साहा, आखाय सिल्प आरो दावबायथाय बायदि हादोरारि फुंखाफोरखौ बाहायग्रा दारिमिनफोरनि थाखाय गोबां खाबु दं। साहा जिल्लायाव 2,000 हेक्टेयरआव जोंहा 5 मिलियननि बांसिन आगर बिफांफोर दं। जों बोधजुंगनगराव मोनसे रबर पार्कबो गायसनदों, जेराव खोला जिल्लायाव गुबुन मोनसे पार्कनि बिथांखि लानाय जादों।

ALSO READ: बर' सावथुन दिहुनगिरि रुपसिं मचाहारीआ 6थि BCAA आव बान्था मोनगिरि सुंद' सावथुननि थाखाय 50,000 रां देरहादों

बिथाङा बुंदोंमोन दि त्रिपुरायाव औवानि मोन 21 हारिसाफोर दं आरो बेयो मोनसे गुवार औवानि खान्थि जागायदों।

"त्रिपुराया गावनि बिफां लाइफांनि आबादफोरनि थाखाय मुंदांखा, जेरै रानि आनारस, जायखौ रायजोनि फिथाइ फोसावनाय जादों आरो GI Tag मोननाय जादों। दावबायथाय सेक्टरावबो गोबां खाबु दं आरो लासै-लासै जौगागासिनो दं। सा-सानजा दावबायारि सार्किटनि खाबु दं, जाय नसुंसेनि हादोरफोरखौ लाफानो हागौ। त्रिपुराया हादोरनि थामथि इन्टारनेट गेटवे खुङो आरो ई-अफिस आरो ई-केबिनेट बायदि हाबाफारिफोर जागायदों," साहाया फोजोबदोंमोन।

बे हाबाफारियाव मिरुनि DoNER मन्थ्रि ज्योतिरादित्य एम. सिन्धिया, मेघालयनि गिबि मन्थ्रि कनराड सांमा आरो गुबुन सुबुंफोरा नुजाथिदोंमोन।