বৈদ্যুতিক দুচকীয়া বাহন কোম্পানী অলাই বৈদ্যুতিক গতিশীলতাৰ সমস্যাৰ অন্ত পেলোৱাৰ কোনো লক্ষণ দেখা পোৱা নাই। চিচিপিএ (কেন্দ্ৰীয় গ্ৰাহক সুৰক্ষা কৰ্তৃপক্ষ)ৰ জাননীৰ পিছত এতিয়া পথ পৰিবহণ আৰু ঘাইপথ মন্ত্ৰালয়েও ওলা ইলেক্ট্ৰিক বিৰুদ্ধে দাখিল কৰা অভিযোগৰ তদন্ত কৰিব পাৰিব। গ্ৰাহকৰ অভিযোগৰ পিছত এই সপ্তাহতে মন্ত্ৰালয়ে নিজৰ ব্যৱস্থা আৰম্ভ কৰিব পাৰে আৰু কোম্পানীটোক প্ৰতিবেদন দাখিল কৰিবলৈ ক’ব পাৰে।
বিজনেছ টুডেৰ প্ৰতিবেদন অনুসৰি সেৱা সন্দৰ্ভত ওলা ইলেক্ট্ৰিকৰ বিৰুদ্ধে লাভ কৰা উদ্বেগ আৰু অভিযোগৰ পৰিপ্ৰেক্ষিতত পথ পৰিবহণ আৰু ঘাইপথ মন্ত্ৰালয়েও সেৱাৰ সৈতে জড়িত বিষয়টোত হস্তক্ষেপ কৰি কোম্পানীটোৰ পৰা প্ৰতিবেদন বিচৰাৰ সিদ্ধান্ত লৈছে। ইয়াৰ পূৰ্বে কোম্পানীটোৰ বিৰুদ্ধে ১০ হাজাৰৰো অধিক গ্ৰাহকৰ অভিযোগৰ বাবে কেন্দ্ৰীয় গ্ৰাহক সুৰক্ষা কৰ্তৃপক্ষই জাননী প্ৰেৰণ কৰিছে।
চিচিপিএৰ জাননীত কোৱা হৈছে যে কোম্পানীটোৱে গ্ৰাহক সুৰক্ষা আইন, ২০১৯ৰ কিছু ধাৰা উলংঘা কৰিছে। ইয়াৰ ভিতৰত আছে দুৰ্বল সেৱা, ভুল বিজ্ঞাপন, অন্যায় বাণিজ্যিক পদ্ধতি আৰু গ্ৰাহকৰ অধিকাৰ উলংঘা। ১৫ দিনৰ ভিতৰত চিচিপিএৰ জাননীৰ উত্তৰ দিব লাগিব কোম্পানীয়ে। বিগত এবছৰত গ্ৰাহক পৰিক্ৰমা বিভাগৰ ৰাষ্ট্ৰীয় গ্ৰাহক হেল্পলাইনত কোম্পানীটোৰ বিৰুদ্ধে ১০,৬৪৪টা অভিযোগ লাভ কৰিছে। এই সকলোবোৰৰ মাজতে ওলা স্কুটাৰৰ দুৰ্বল সেৱাৰ সন্দৰ্ভত অভিযোগ দাখিল কৰা হৈছে।
ক্ৰমাৎ বৃদ্ধি পাইছে অলা ইলেক্ট্ৰিকৰ সমস্যা। এফালে গ্ৰাহকৰ অভিযোগ আৰু আনফালে বৈদ্যুতিক বাহনৰ বিক্ৰীত কোম্পানীটোৰ অংশীদাৰিত্ব মাহৰ পিছত মাহ ধৰি ক্ৰমাগতভাৱে হ্ৰাস পাইছে। বাজাজ অটো আৰু টিভিএছ মটৰ্ছে দ্ৰুতগতিত অলা ইলেক্ট্ৰিকৰ বজাৰ অংশীদাৰিত্ব দখল কৰিছে। ইয়াৰ উপৰিও কোম্পানীটোৰ মুখ্য কাৰ্যবাহী বিষয়া ভৱিষ আগৰৱালা আৰু কমেডিয়ান কুনাল কামৰাৰ মাজত ছ’চিয়েল মিডিয়াত চলি থকা বাকযুদ্ধৰ বাবেও কোম্পানীটোৱে বাতৰিৰ শিৰোনাম দখল কৰিছে।
এই সকলোবোৰ কথাৰ মাজতো মঙলবাৰৰ ব্যৱসায়িক অধিবেশনত কোম্পানীটোৰ ষ্টক ৫.০৫ শতাংশ বৃদ্ধিৰে বন্ধ হোৱাটো অলা ইলেক্ট্ৰিকৰ বাবে সকাহৰ কথা। পুৱা শ্বেয়াৰ বজাৰ খোলাৰ পিছত ৮৬ টকালৈ হ্ৰাস পাইছিল যদিও নিম্নস্তৰৰ পৰা ষ্টকত পুনৰুদ্ধাৰ দেখা গৈছিল আৰু ষ্টকটো ডাঙৰ জঁপিয়াই বন্ধ হৈ পৰিছিল।