খুচুৰা গহনা বিক্ৰীৰ ব্যৱসায়ত কঠোৰ প্ৰতিযোগিতাৰ সাক্ষী হ’বলৈ গৈ আছে। ইতিমধ্যে এই ছেগমেণ্টত উপস্থিত আছে টাটা আৰু আম্বানীৰ দৰে দৈত্য। এতিয়া দেশৰ অন্যতম বিশিষ্ট ব্যৱসায়িক প্ৰতিষ্ঠান আদিত্য বিৰলা গ্ৰুপেও ব্ৰেণ্ডেড খুচুৰা গহনা ব্যৱসায়ত প্ৰৱেশ কৰিছে। অৰ্থাৎ আগন্তুক দিনত বিৰলাই টাটা আৰু আম্বানীৰ সৈতে গহনা ব্যৱসায়ত প্ৰতিদ্বন্দ্বিতা কৰিবলৈ ওলাইছে।
কুমাৰ মংগলম বিৰলাৰ নেতৃত্বাধীন আদিত্য বিৰলা গ্ৰুপে শুকুৰবাৰে মুকলি কৰে ইন্দ্ৰিয়া নামৰ নতুন গহনা খুচুৰা ব্ৰেণ্ড। এইদৰে টেলিকমৰ পৰা আৰম্ভ কৰি চাৰ্ট-পেণ্টলৈকে আদিত্য বিৰলা গ্ৰুপৰ ব্যৱসায়ত গহনা নামটোও অন্তৰ্ভুক্ত হৈছে। আদিত্য বিৰলা গ্ৰুপৰ প্ৰধান কোম্পানীসমূহৰ ভিতৰত আছে দেশৰ সৰ্ববৃহৎ চিমেণ্ট কোম্পানী আল্ট্ৰাটেক আৰু আগশাৰীৰ টেলিকম অপাৰেটৰ ভোডাফোন আইডিয়াৰ নাম। বিত্তীয় সেৱা আৰু ফেশ্বনৰ দৰে ব্যৱসায়তো এই গোটটোৰ শক্তিশালী উপস্থিতি আছে।
যি সময়ত দেশৰ অব্ৰেণ্ডেড গহনাৰ তুলনাত ব্ৰেণ্ডেড গহনাৰ আকৰ্ষণ বৃদ্ধি পাইছে সেই সময়তে ব্ৰেণ্ডেড গহনা খুচুৰা ব্যৱসায়ত প্ৰৱেশ কৰিছে বিৰলা গ্ৰুপে। গ্ৰাহকৰ এক বৃহৎ অংশই এতিয়া পৰম্পৰাগত বুলিয়নৰ দোকানৰ পৰিৱৰ্তে ব্ৰেণ্ডেড গহনা ক্ৰয় কৰাটো পছন্দ কৰিছে। এই ছেগমেণ্টত ইতিমধ্যে উপস্থিত বহু দৈত্যৰ সৈতে বিৰলাৰ প্ৰত্যক্ষ প্ৰতিযোগিতা হ’ব। টানিচ্ক ব্ৰেণ্ডৰ জৰিয়তে টাটা গ্ৰুপ, ৰিলায়েন্স জুৱেলছৰ জৰিয়তে ৰিলায়েন্স গ্ৰুপৰ উপৰিও কল্যাণ জুৱেলাৰছ, জয়ালুক্কাছ, মালাবাৰ আদি ব্ৰেণ্ড ইতিমধ্যে ব্ৰেণ্ডেড জুৱেলাৰীৰ এই ছেগমেণ্টত আছে।
ব্ৰেণ্ডেড গহনা ব্যৱসায়ৰ বাবে আদিত্য বিৰলা গ্ৰুপে গঠন কৰিছে নতুন কোম্পানী। ইয়াৰ নাম ৰখা হৈছে নভেল জুৱেলছ। গহনা ব্যৱসায়ৰ বাবে ৫ হাজাৰ কোটি টকা বিনিয়োগৰ পৰিকল্পনা যুগুত কৰিছে গোটটোৱে। ভাৰতৰ গহনা বজাৰৰ আকাৰ প্ৰায় ৬.৭ লাখ কোটি টকা বুলি কোৱা হৈছে।
নিজৰ গ্ৰুপৰ গহনা ব্ৰেণ্ড ইন্দ্ৰিয়া উন্মোচন উপলক্ষে কুমাৰ মংগলম বিৰলাই কয় যে আগন্তুক পাঁচ বছৰত এই ব্ৰেণ্ডটোক দেশৰ শীৰ্ষ ৩ গহনা ব্ৰেণ্ডৰ ভিতৰত অন্যতম কৰি তোলাৰ লক্ষ্য। কুমাৰ মংগলম বিৰলা বৰ্তমান আদিত্য বিৰলা গ্ৰুপৰ অধ্যক্ষ। তেওঁ কয় যে বৰ্তমান তেওঁৰ গোটৰ ৰাজহৰ প্ৰায় ২০ শতাংশ গ্ৰাহক ব্যৱসায়ৰ পৰা আহিছে। তেওঁ আশা কৰিছে যে অহা পাঁচ বছৰত এই সংখ্যা ২৫ শতাংশতকৈ অধিক বৃদ্ধি পাই ২৫ বিলিয়ন ডলাৰৰ ওচৰ চাপিব।