কেন্দ্ৰীয় মন্ত্ৰী সৰ্বানন্দ সোণোৱালে চেন্নাই আৰু কামৰাজাৰ বন্দৰত মূল আন্তঃগাঁথনি প্ৰকল্প উদ্বোধন কৰে

কেন্দ্ৰীয় বন্দৰ, জাহাজ আৰু জলপথ বিভাগৰ মন্ত্ৰী শ্ৰী সৰ্বানন্দ সোণোৱালে আজি চেন্নাই বন্দৰ কৰ্তৃপক্ষ (চি পি এ) আৰু কামৰাজাৰ বন্দৰ লিমিটেড (কে পি এল)ত ধাৰাবাহিকভাৱে বৃহৎ আন্তঃগাঁথনি প্ৰকল্প আৰম্ভ কৰিবলৈ চেন্নাই ভ্ৰমণ কৰে। ১৮৭.৩৩ কোটি টকাৰ সংযুক্ত বিনিয়োগেৰে এই প্ৰকল্পসমূহৰ লক্ষ্য হৈছে বন্দৰৰ আন্তঃগাঁথনি বৃদ্ধি কৰা, বাণিজ্যক সুশৃংখলিত কৰা, আৰু ভাৰতৰ সেউজ বন্দৰৰ লক্ষ্যসমূহক সমৰ্থন কৰা।

চেন্নাই বন্দৰত চাৰিটা এক্সিমৰ গুদাম নিৰ্মাণকে ধৰি নতুন উন্নয়নৰ শুভাৰম্ভ কৰে মন্ত্ৰীগৰাকীয়ে। ৭৩.৯১ কোটি টকা ব্যয়েৰে নিৰ্মিত আৰু ১৮ হাজাৰ বৰ্গমিটাৰ বিস্তৃত এই গুদামসমূহে কৃষি সামগ্ৰীৰ দৰে স্পৰ্শকাতৰ সামগ্ৰী মজুত কৰিব, যাৰ ফলত মজুত কৰাৰ ক্ষমতা বৃদ্ধি পাব। ইয়াৰ উপৰিও গধুৰ সামগ্ৰীৰ মসৃণ চলাচলৰ সুবিধা আৰু বন্দৰৰ চাৰিওফালে প্ৰদূষণ হ্ৰাস কৰাৰ বাবে ৪ কোটি টকাৰে উন্নয়ন কৰা ৩৫০ মিটাৰ দৈৰ্ঘ্যৰ নতুন পকী পথ মুকলি কৰা হয়।

কামৰাজাৰ বন্দৰত শ্ৰী সোণোৱালে ৮৮.৯১ কোটি টকা ব্যয় সাপেক্ষে ২.৬৫ কিলোমিটাৰ ৰেলপথ সংযোজন কৰি দক্ষিণ ৰেলৱে সংযোগ দুগুণ প্ৰকল্পৰ শুভাৰম্ভ কৰে। এই সম্প্ৰসাৰণত তিনিটা নতুন ৰেল দলং আৰু উন্নীতকৃত ক্ৰছিং অন্তৰ্ভুক্ত কৰা হৈছে, যাৰ ফলত বন্দৰটোৰ ৰেল পৰিচালনা ক্ষমতা প্ৰতিদিনে ২২ৰ পৰা ৪৪টা ৰেকলৈ দুগুণ হ’ব। ২০.৫১ কোটি টকাত বিকশিত কৰা কেপিএলত কয়লা জাহাজৰ বাবে আন এটা প্ৰকল্প শ্ব’ৰ পাৱাৰ চাপ্লাই ফেচিলিটিও আৰম্ভ কৰা হয়। এই সুবিধাই বাৰ্থত ডক কৰা জাহাজসমূহক পৰিষ্কাৰ শক্তি প্ৰদান কৰে, যাৰ ফলত নিৰ্গমন হ্ৰাস পায় আৰু ডিজেল ইঞ্জিনৰ ওপৰত নিৰ্ভৰশীলতা হ্ৰাস পায়।

মন্ত্ৰী সোণোৱালে এই প্ৰকল্পসমূহৰ তাৎপৰ্য্যৰ ওপৰত গুৰুত্ব আৰোপ কৰি উল্লেখ কৰে যে, “এই পদক্ষেপসমূহে আমাৰ সামুদ্ৰিক আন্তঃগাঁথনি শক্তিশালী কৰে আৰু বহনক্ষমতাক প্ৰসাৰিত কৰে, আমাৰ বন্দৰসমূহক বিশ্ব বাণিজ্যৰ দাবীৰ বাবে প্ৰস্তুত কৰাৰ লগতে সেউজ পদ্ধতিসমূহক সমৰ্থন কৰে।”

ALSO READ: অসম চৰকাৰৰ দ্বাৰা যুৱক-যুৱতীসকলৰ বাবে প্ৰধানমন্ত্ৰীৰ ইন্টাৰশ্বিপ আঁচনিৰ শুভাৰম্ভ

আই এ পি এইচৰ বহনক্ষমতা বঁটাৰ প্ৰতিবেদন আৰু কে পি এলৰ চি এছ আৰৰ কৃতিত্বৰ স্বীকৃতি প্ৰদানৰ জৰিয়তে অনুষ্ঠানৰ সামৰণি পৰে। ইয়াৰ উপৰিও পঞ্চ প্ৰাণৰ পদক্ষেপৰ অধীনত স্থানীয় ঐতিহ্যক সন্মান জনাই ঐতিহাসিক ‘ক্লাইভ বেটাৰী কোৱাৰ্টাৰ’ৰ নাম সলনি কৰি ‘ৰামানুজন কোৱাৰ্টাৰ’ ৰখা হয়।

এই প্ৰকল্পসমূহে বিশ্ব বাণিজ্যত ভাৰতৰ ভূমিকাক শক্তিশালী কৰি বহনক্ষম, দক্ষ, আৰু ভৱিষ্যতৰ বাবে সাজু বন্দৰ পৰিৱেশ তন্ত্ৰ গঢ়ি তোলাৰ বাবে মন্ত্ৰালয়ৰ নিষ্ঠা প্ৰতিফলিত কৰে।