रासियाआ म्यानमारआव रुंमा गाथोन, थाव सोदांग्रा कारखाना लुनो थाखाय गोसोखां बिलाइयाव सागान होदों

रासियानि रांखान्थियारि जौगाथाय मन्थ्रि बिफाना रबिबाराव बुंदोंमोन दि म्यानमार आरो बिनि खाथि हेफाजाबगिरि रासियाया दावेइआव मोनसे जर'खा रांखान्थियारि ओनसोलाव रां थिसननायनि हेफाजाबनि सायाव मोनसे गोसोखां बिलायाव सागान होदोंमोन, जेराव मोनसे जाहाज गाथोन आरो थाव सोदांग्रा कारखाना लुनाय दंमोन।
बे खाख्रियाव रासियानि मन्थ्रि बिफाननि गाहाय मैक्सिम रेशेतनिक'भ आरो म्यांमारनि रां थिसननाय आरो गुबुन हादोरारि रांखान्थियारि सोमोन्दोनि मन्थ्रि कान जावआ खोला-सानजा एसियानि हादोराव रासियानि थान्दै हानजानि दावबायनाय समाव सागान होदोंमोन।

"बिसम्बिलायनि बिजाबाव गोबां गिदिर बिथायारि सानज'थाय आरो गोहो मावथांखिफोरनि गुदि मानथाखोफोर दं जायखौ म्यांमारआव रासियानि कम्पानिफोरजों जयै मावफुंनाय जादों," रासियानि मन्थ्रि बिफाना रेशेतनिकोवखौ मोनसे बिबुंथियाव बुंदोंमोन।

"जों मोनसे रुंमा गाथोन, खैलाजों सोलिनाय थार्मेल पावार प्लान्ट आरो थाव सोदांग्रा कारखाना लुनायनि मावथांखिफोरनि बादै रायज्लायगासिनो दं।"

बिथाङा दाजाबदेरदोंमोन दि "थाव सोदांनाया दासिमबो बयनिख्रुइबो गोब्राबसिन गुदिमुवा", आरो मोनसे रिफाइनारी लुनायनि सायाव जेबो जोबथा थिरांथा गैयामोन।

"रिफाइनारीनि बाथ्रा - म्यानमारनि फारसेथिं मोनसे रिफाइनारी थानो लुबैनाय दं। जोंनि कम्पानिफोरा दासिमबो बेबादि मावथांखिनि रांखान्थियारि बिथिंखौ फरायगासिनो दं, बेयो रांखान्थियारि जाथावनानि नोजोरजों जोबोद जेथोगोनां, " इन्टारफेक्स खौरां एजेन्सिआ रेशेतनिक'भखौ मुंख'दों।

ALSO READ: आमेरिकान डलारनि रुजुनायाव रुपया 13 फैसा बांनानै 86.58 आव खुलिदों

रासियानि मन्थ्रि बिफाननि बायदिब्ला, दावेइ जर'खा रांखान्थियारि ओनसोला आन्डामान लैथोआव 196 बर्ग किल'मिटारनि मोनसे मावथांखि जेराव गोजौ आरोंदायारि दारिमिनारि ओनसोलफोर आरो हान्था-मेलानि मिरुफोर, खौरां बिरोंदामिन ओनसोलफोर आरो दैथायहरनाय प्रसेसिं ओनसोलफोर थानो बिथांखि लानाय जादों।

फेब्रुआरि 2021 मायथाइयाव आं सान सू कीनि सायख'जानाय नोगोरारि सोरखारखौ बोख्लायनाय रौनिया बिग्रायखांनायनि उनाव रासियाया म्यानमारनि खाथिसिन हेफाजाबगिरि जाबाय।

मस्को आरो नेपिदावआ म्यानमारनि गाहाय नोगोर यांगुनसिम गेस पाइपलाइन लुनायाव रासियानि बाहागो लानायजों लोगोसे मोनसे गोथौ गोहो हेफाजाबनि सायाव सावरायगासिनो दं। रासियाहा हादोराव परमाणु बिजिरसं रिएक्टरनि थाखायबो सानथांखि दंमोन।