ঘেঁহু আমদানিঃ বৰ্ধিত ঘেঁহুৰ দামক লৈ চিন্তিত, অহা মাহৰ পৰা চৰকাৰে হ্ৰাস কৰিব  আমদানি শুল্ক

ঘৰুৱা বজাৰত ঘেঁহুৰ বৰ্ধিত মূল্যই এতিয়া চৰকাৰক অশান্তি দিবলৈ আৰম্ভ কৰিছে। খাদ্য সামগ্ৰীৰ মুদ্ৰাস্ফীতি বৃদ্ধিৰ বাবে ইতিমধ্যে অৰ্থনীতি এক প্ৰত্যাহ্বান হৈ পৰিছে। এনে পৰিস্থিতিত ঘেঁহু ব্যয়বহুল হোৱাৰ বাবে সমস্যা আৰু বাঢ়িব পাৰে। এই কাৰণতে অহা মাহৰ পৰা ঘেঁহুৰ আমদানিৰ ওপৰত শুল্ক হ্ৰাস কৰাৰ সিদ্ধান্ত লৈছে চৰকাৰে।

মিণ্টৰ এক প্ৰতিবেদন অনুসৰি আমদানি শুল্ক হ্ৰাস কৰি দেশত ঘেঁহুৰ আমদানি পুনৰ আৰম্ভ কৰাৰ কথা চিন্তা কৰিছে। ইয়াৰ উপৰিও চৰকাৰে ঘেঁহুৰ ক্ষেত্ৰত ষ্ট’ৰেজ লিমিট অৰ্থাৎ ষ্টক লিমিট আৰোপ কৰাৰ কথাও চিন্তা কৰিছে। চৰকাৰে মুকলি বজাৰ অপাৰেচন চেলও আৰম্ভ কৰিব পাৰে। তিনিজন বিষয়াৰ উদ্ধৃতিৰে প্ৰতিবেদনত উল্লেখ কৰা হৈছে যে এই প্ৰচেষ্টাসমূহ ঘৰুৱা বজাৰত ঘেঁহুৰ যোগান বৃদ্ধি আৰু মূল্য নিয়ন্ত্ৰণৰ বাবে কৰা হৈছে।

দীৰ্ঘদিন ধৰি ঘেঁহুৰ ব্যৱসায়ীসকলে আমদানি শুল্ক হ্ৰাস কৰাৰ দাবী জনাই আহিছে। দৰাচলতে ৰাছিয়াত ঘেঁহুৰ উৎপাদন বৃদ্ধি আৰু মজুত জমা হোৱাৰ বাবে বৰ্তমান আন্তঃৰাষ্ট্ৰীয় বজাৰত ঘেঁহুৰ দাম কোমল হৈ পৰিছে। এনে পৰিস্থিতিত ব্যৱসায়ীসকলে যুক্তি আগবঢ়ায় যে ভাৰতে ঘৰুৱা বজাৰত যোগানৰ সমস্যাৰ মাজত আন্তৰ্জাতিক মূল্য কম হোৱাৰ সুযোগ গ্ৰহণ কৰি আমদানিৰ ওপৰত গুৰুত্ব দিব লাগে।
কিন্তু ঘেঁহু আমদানি সহজ কৰাৰ সিদ্ধান্তৰ বিৰোধিতা হ’ব পাৰে কৃষকসকলে। বিভিন্ন কৃষক সংগঠনে ঘেঁহু আমদানি প্ৰতিকূল বুলি অভিহিত কৰি আহিছে। কৃষকসকলে যুক্তি আগবঢ়ায় যে বাহিৰৰ দেশৰ পৰা ঘেঁহু আমদানি কৰি তেওঁলোকে নিজৰ উৎপাদিত সামগ্ৰীৰ সঠিক মূল্য নাপায়

বিশ্বৰ ভিতৰতে ঘেঁহু উৎপাদনৰ দ্বিতীয় বৃহত্তম দেশ ভাৰত। ইয়াৰ সমান্তৰালকৈ ভাৰতত ঘেঁহুৰ ব্যৱহাৰো অতি বেছি। যদিও ভাৰতে প্ৰয়োজনতকৈ অধিক ঘেঁহু উৎপাদন কৰে, তথাপিও যোৱা ৰবি বতৰত উৎপাদন ভাল নাছিল, যাৰ বাবে চৰকাৰী ঘেঁহুৰ ক্ৰয় কম হৈছে। আনহাতে, বিনামূলীয়া খাদ্য শস্য আঁচনিৰ অধীনত অবিৰত ব্যৱহাৰৰ বাবে চৰকাৰৰ সংৰক্ষিত মজুত হ্ৰাস পাইছে। এনে পৰিস্থিতিত এতিয়া চৰকাৰে আমদানিৰ বিকল্প বিবেচনা কৰিব লগা হৈছে।

ভাৰতে ছবছৰ পূৰ্বে ঘেঁহুৰ আমদানিৰ ওপৰত ৪৪ শতাংশ বৃহৎ আমদানি শুল্ক আৰোপ কৰিছিল। ইয়াৰ বাবে বাহিৰৰ পৰা ঘেঁহু আমদানি কৰাটো অতি ব্যয়বহুল হৈ পৰিছিল আৰু এক প্ৰকাৰে আমদানি প্ৰায় বন্ধ হৈ গৈছিল। চৰকাৰে এই শস্য বৰ্ষত ঘেঁহুৰ উৎপাদন প্ৰায় যোৱা বছৰৰ স্তৰত ৰাখিছে ১১২.৯ মিলিয়ন টন। যোৱা বছৰ দেশত ৩৮ লাখ টন ঘেঁহুৰ উৎপাদন হ্ৰাস পাইছে।