বাঁহৰ জৰিয়তে মহিলা সবলীকৰণঃ মেঘালী দাসে বিনামূলীয়া বাঁহৰ গহনা কৰ্মশালাৰ সফলতাৰ ওপৰত আলোকপাত কৰে

বাঁহ হৈছে এক অতি বহুমুখী আৰু বহনক্ষম সম্পদ যিয়ে সম্প্ৰদায়সমূহক পৰিৱেশ, অৰ্থনৈতিক আৰু জীৱিকাৰ সুবিধা প্ৰদান কৰে। ১৩.৯৬ কোটি হেক্টৰ ভূমি সামৰি বিশ্বৰ ভিতৰতে সৰ্বাধিক বাঁহৰ ক্ষেত্ৰ ভাৰতত আছে আৰু চীনৰ পিছতে ১৩৬টা বাঁহ প্ৰজাতিৰ (১২৫টা থলুৱা আৰু ১১টা বিদেশী) দ্বিতীয় সৰ্বাধিক জৈৱ বৈচিত্ৰ্যপূৰ্ণ দেশ হিচাপে স্থান লাভ কৰিছে। 

শেহতীয়াকৈ বিজনেছ নৰ্থইষ্টৰ সৈতে হোৱা এক সাক্ষাৎকাৰত প্ৰখ্যাত সামাজিক উদ্যোগী মেঘালী দাসে পূৰ্বাঞ্চল চ'চিঅ'  ইক'নমিক ডেভেলপমেণ্ট কাউন্সিল আৰু অৰ্গেনাইজেচন ফৰ ছ’চিয়েল হেল্থ এণ্ড ডেভেলপমেণ্টৰ উদ্যোগত আয়োজিত বিনামূলীয়া বাঁহৰ গহনা নিৰ্মাণ কৰ্মশালাৰ সফলতাৰ ওপৰত আলোকপাত কৰে। অসমৰ বিভিন্ন প্ৰান্তৰ ৪০ গৰাকী মহিলাক একত্ৰিত কৰা এই পদক্ষেপৰ লক্ষ্য হৈছে বাঁহৰ বহুমুখীতা আৰু পৰিৱেশ অনুকূল স্বভাৱৰ বাবে সততে "সেউজীয়া সোণ" বুলি কোৱা বাঁহৰ অনাবৃত সম্ভাৱনাক লাভান্বিত কৰি মহিলা সবলীকৰণ কৰা।

মেঘালী দাসে কয় যে ৰাষ্ট্ৰীয় আৰু আন্তঃৰাষ্ট্ৰীয় পৰ্যায়ত বাঁহৰ বিশ্বব্যাপী চাহিদা আকাশলংঘী হৈছে। "সঠিক প্ৰশিক্ষণৰ দ্বাৰা আমাৰ মহিলাসকলে এই উত্থানশীল বজাৰখনক ব্যৱহাৰ কৰি আৰ্থিক স্বাধীনতা লাভ কৰিব পাৰিব।" কৰ্মশালাখনত অধিবেশনৰ সময়ত তৈয়াৰ কৰা গহনাসমূহৰ মূল্য নিৰ্ধাৰণ কৌশলৰ ওপৰত হাতে কামে প্ৰশিক্ষণ, সামগ্ৰী, আৰু নিৰ্দেশনা প্ৰদান কৰা হয়।

উত্তৰ-পূব ভাৰতৰ মানুহৰ দৈনন্দিন জীৱনৰ সৈতে গভীৰভাৱে সংযুক্ত বাঁহে প্ৰচণ্ড অৰ্থনৈতিক সম্ভাৱনা প্ৰদান কৰে। “গ্ৰাম্য অঞ্চলত প্ৰায় প্ৰতিটো ঘৰতে বাঁহ গছ থাকে, আৰু চহৰৰ বজাৰত এডাল বাঁহ ১৫০–২০০ টকাত বিক্ৰী কৰিব পাৰি। উল্লেখযোগ্য কথাটো হ’ল বাঁহৰ প্ৰতিটো অংশ ব্যৱহাৰ কৰিব পাৰি—একোৱেই অপচয় নহয়। এডাল বাঁহৰ পৰা ১ লাখ টকা পৰ্যন্ত উপাৰ্জনৰ সম্ভাৱনা আছে।’-মেঘালী দাসে ব্যাখ্যা কৰে।

কৰ্মশালাৰ অংশগ্ৰহণকাৰীসকলে ৰাষ্ট্ৰীয় আৰু আন্তঃৰাষ্ট্ৰীয় বজাৰৰ চাহিদা পূৰণ কৰা উচ্চমানৰ বাঁহৰ গহনা তৈয়াৰ কৰাৰ কৌশল শিকিলে। কৰ্মশালাৰ সময়ত নিৰ্মাণ কৰা সামগ্ৰীসমূহ পুনৰ ক্ৰয় কৰি বহল বজাৰত প্ৰদৰ্শন কৰাৰ প্ৰতিশ্ৰুতি দিছে সংস্থাটোৱে, যাৰ ফলত মহিলাসকলে বহনক্ষম আয় লাভ কৰিব পাৰিব।

“বাঁহ গছে আন গছতকৈ ৩৫% অধিক কাৰ্বন ডাই অক্সাইড শোষণ কৰে, যাৰ ফলত ই পৰিৱেশৰ বাবে এক আশীৰ্বাদ। ফেশ্বন উদ্যোগত ইয়াৰ জনপ্ৰিয়তা বৃদ্ধি পাইছে, আৰু গুণগত মানৰ ওপৰত নিৰ্ভৰ কৰি স্থানীয়ভাৱে ৫০০ টকাৰ গহনাই আন্তঃৰাষ্ট্ৰীয় পৰ্যায়ত ৫ হাজাৰ টকা আনিব পাৰে।’ মেঘালী দাসে আলোকপাত কৰে।

ALSO READ: অসমৰ Cultural Mapping Project ৰ জৰিয়তে সংস্কৃতিৰ লগতে হ'ব অৰ্থনৈতিক বিকাশ

ইতিমধ্যে এই পদক্ষেপে জীৱনৰ পৰিৱৰ্তন ঘটাইছে। মেঘালী দাসে লগতে কয়, "আজি মই গৌৰৱেৰে ক'ব পাৰো যে যিসকল মহিলাৰ এসময়ত কোনো উপাৰ্জন নাছিল, তেওঁলোকে এতিয়া এনে কৰ্মশালাত অংশগ্ৰহণ কৰি মাহে ১০০০ৰ পৰা ৩০ হাজাৰ টকাৰ ভিতৰত উপাৰ্জন কৰিবলৈ সক্ষম হৈছে আৰু লগতে কয় যে এনে ধৰণৰ পৰিৱৰ্তনৰ বাবে আমি চেষ্টা কৰো আৰু এই চেষ্টা অনাগত ভৱিষ্যতলৈও অব্যাহত থাকিব। 

বাঁহৰ সম্ভাৱনা মুকলি কৰি এই কৰ্মশালাখনে কেৱল পৰম্পৰাগত কাৰুকাৰ্য্যক সংৰক্ষণ কৰাই নহয়, অঞ্চলটোৰ মহিলাসকলৰ বাবে আৰ্থিক স্বাধীনতা আৰু বহনক্ষম জীৱিকাৰ দুৱাৰ মুকলি কৰিছে।