आसामनि गिबि मन्थ्रि हिमन्त बिस्व शर्माया मुम्बाइआव फालांगियारि टाइकुनफोरखौ लोगो हमदों

गुवाहाटी: गिबि मन्थ्रि ड° हिमन्त बिश्व सर्माया गावनि मुम्बाइ दावबायनायनि नैथि सानाव दिनै टाटा ट्रास्टनि मासिगिरि न'एल टाटा आरो बिथांनि फिसाज्ला नेभिल टाटाखौ लोगो हमदोंमोन आरो आसामाव ट्रास्टनि रां थिसननायनि थाखाय साबायखर बावदोंमोन। बिथाङा बिसोरखौ एडभान्टेज आसाम 2.0 समिटआवबो हांख्रायहरदोंमोन।

ड. सर्माया गावनि मुम्बाइ दावबायनायनि मोनसे बाहागो महरै महिन्द्रा ग्रुप आनन्द महिन्द्रानि मासिगिरिखौबो लोगो हमदोंमोन आरो बिथांखौ हादोरसायाव दारिमिनारि जौगाथायनि थाखाय आसाम सोरखारजों लोगो जानो थाखाय हांख्रायहरदोंमोन।

मुम्बाइनि गेटवे बिल्डिंग, स्टीवन स्ट्रीटआव सानजौफुनि जानायनि समाव आनन्द महिन्द्राजों लोगो हमनानै, गिबि मन्थ्रि डॉ. सरमाया दारिमिनारि खालामनायनि थाखाय आनन्द महिन्द्रानि गोसो गुदुं आरो बिथांनि मेलेमारि गोहोखौ बाख्नायनानै रायजोआव दारिमिनारि खालामनायनि गोख्रैथिखौ गोख्रै खालामनो थाखाय महिन्द्रा ग्रुपजों लोगो जानायाव रायजो सोरखारनि गोथौ गोसो जानायखौ फोरमायो।

बिथाङा 25 आरो 26 फेब्रुआरि, 2025 मायथाइयाव गुवाहाटीयाव जानो गोनां एडभान्टेज आसाम 2.0 इनभेस्टमेन्ट एन्ड इन्फ्रास्ट्रक्चर समिटआव महिन्द्रा ग्रुपनि मासिगिरिखौबो हांख्रायहरदोंमोन।

गिबि मन्थ्रि ड. सर्माया सिइअ' L&T एसएन सुब्रमण्यमखौबो लोगो हमदोंमोन आरो बिथांखौ इनभेस्टमेन्ट एन्ड इन्फ्रास्ट्रक्चर समिटआव हांख्रायहरदोंमोन। ड. सर्माया बुंदोंमोन दि रायजोआव गोबां गोजौ बेसेननि सोलिबाय थानाय इन्फ्रा प्रजेक्टफोरजों, आसामा इन्फ्रा कम्पानिफोरनि थाखाय मोनसे चुम्बक।

बेनिखायनो, एल एन्ड टीआ आसाम सोरखारजों लोगो जानो हागौ आरो आसामखौ रां थिसननायनि मिरु बानायनायाव सोरखारनि दाबियाव हेफाजाब होनो हागोन। ड. सर्माया लुनायाव गोजोर आरो गोदान मुगानि बिरोंदामिन नाजावनायजों सोमोन्दो थानाय बिथिंफोरनि सायावबो सावरायदोंमोन।

गिबि मन्थ्रि ड. सारमाया वेलस्पन हानजा बीके गोयनकानि मासिगिरिजोंबो मोनसे सावराय मेल खुंदोंमोन आरो गिलिर दारिमिनफोर आरो सि-जोम सेक्टरफोराव सोमोनांथाव खाबुफोर होनायनि सायाव नोजोर होदोंमोन।

बिथाङा रायजोआव आसाम सोरखारनि रां थिसननाय बिथांखिफोरनि फारसे वेलस्पन दारिमिननि मासिगिरिनिबो गोसो बोनो हादोंमोन।
बिनि सिगाङाव ड. सर्माया HDFC बेंकनि CEO शशिधर जगदिशानजों मोनसे सावराय मेल खुंदोंमोन।

सावरायनायनि समाव ड. सारमाया रायजो सोरखारा आसामनि रांखान्थिखौ नेमखान्थि गोनां खालामनो नाजानायफोरनि सायाव गुवारै फोरमायदों, गुबैयै DBT खौ गोनांथि होनानै। मोनसे रोंग'थि गोनां आरो आब्रुथिगोनां खामानि मावग्रा हानजाजों आसामआ भारतनि जौगाफुनाय बेंकिं दारिमिनखौबो गोबां खाबु होयो, गिबि मन्थ्रिआ बोसोन होयो।

ड. सर्माया गुबुन गुबुन सेक्टरफोराव HDFC जों रायजो सोरखारनि जाथावना हेफाजाबनि सायावबो सावरायदोंमोन। बिथाङा बिथांखौ आसामनि जौगानायनि थाखाय आरोबाव लामा नागिरनो थाखाय फैबाय थानाय एडभान्टेज आसाम 2.0 जथुम्मायाव बाहागो लानो थाखायबो हांख्रायहरदोंमोन।

गिबि मन्थ्रि ड. सर्माया हिन्दुस्तान यूनिलीवरनि रहित जावा, देव बाजपेयी आरो योगेश मिश्राखौबो लोगो हमदोंमोन। बिथाङा बिथांमोनजों आसामनि साहा दारिमिनखौ आरोबाव जौगाहोनायनि राहाफोरनि बादै सावरायदोंमोन।

ALSO READ: सुजलन एनार्जिनि बाहागोआ दिनै 4 जौखोन्दोनि बांसिन गोग्लैदों, बेयाव मानो दं

बिथाङा रां थिसननायनि गोदान जाथावनाफोरखौ नागिरनो थाखाय हानजाखौ रायजोआव गावसोरनि आथिंनि प्रिन्टखौ फेहेरनो आरो फैबाय थानाय एडभान्टेज आसाम जथुम्मायाव हानजानि बाहागो लानायनि सायाव साननो थाखाय हांख्रायहरदोंमोन।

गिबि मन्थ्रि ड. सर्माया गोजौ थाखोनि दारिमिननि गेलेगिरिफोरजों सावरायनायनि मोनसे फारि महरै MD, लक्समी टी रुद्र चेटार्जीखौबो लोगो हमदोंमोन आरो बिथांखौ फैबाय थानाय इनभेस्टमेन्ट एन्ड इन्फ्रास्ट्रक्चर समिटआव हांख्रायहरदोंमोन।

ड. सरमाया अडानी अनलाइननि सामलायगिरि जीत अदानीजोंबो मोनसे सावरायदोंमोन आरो आसामाव बिथायारि सानजथाइ, मोब्लिब गोहो आरो रैखाथि बिथिङाव खाबु नागिरनो हानजानि गोसो गुदुं जानायखौ फोरमायदोंमोन। बिथाङा हानजानि फेहेरनाय बिथांखिखौ रोखायै बिबुंसार होनायाव रायजो सोरखारनि गोसो जानायखौ खोथा होदोंमोन।