ভাৰতৰ মহাৰাষ্ট্ৰৰ সৰ্ববৃহৎ গভীৰ পানীৰ বন্দৰঃ আজি ৭৬ হাজাৰ কোটি টকাৰ বাধ্বন বন্দৰৰ ভেটি স্থাপন কৰিব প্ৰধানমন্ত্ৰী মোদীয়ে

প্ৰধানমন্ত্ৰী নৰেন্দ্ৰ মোদীয়ে আজি মহাৰাষ্ট্ৰ ভ্ৰমণ কৰাৰ কথা, য’ত তেওঁ মুম্বাইত অনুষ্ঠিত হ’বলগীয়া গ্ল’বেল ফিনটেক ফেষ্ট (জিএফএফ) ২০২৪ত ভাষণ দিব আৰু বাধ্বন বন্দৰ প্ৰকল্পৰ আধাৰশিলা স্থাপন কৰিব, যিটো প্ৰায় ৭৬,০০০ কোটি মূল্যৰ উল্লেখযোগ্য কাম বুলি তেওঁৰ কাৰ্যালয়ে প্ৰকাশ কৰিছে।

পুৱা ১১ বজাত মুম্বাইস্থিত জিঅ’ ৱৰ্ল্ড কনভেনশ্যন চেণ্টাৰত জিএফএফক সম্বোধন কৰি প্ৰধানমন্ত্ৰী মোদীয়ে ভ্ৰমণ আৰম্ভ কৰিব। ইয়াৰ পিছতে বৃহস্পতিবাৰে প্ৰধানমন্ত্ৰীৰ কাৰ্যালয়ৰ পৰা প্ৰকাশিত এক বিবৃতিত উল্লেখ কৰা অনুসৰি দিনৰ ১:৩০ বজাৰ ওচৰত পালঘৰৰ চিডকো খেলপথাৰত তেওঁ বিভিন্ন উন্নয়নমূলক প্ৰকল্পৰ উদ্বোধন আৰু ভেটি স্থাপন কৰিব।

বাধ্বন বন্দৰ প্ৰকল্পৰ লক্ষ্য হৈছে অত্যাধুনিক সামুদ্ৰিক প্ৰৱেশদ্বাৰ সৃষ্টি কৰা যিয়ে ভাৰতৰ বাণিজ্যিক সামৰ্থ্য বৃদ্ধি কৰিব বুলি আশা কৰা হৈছে।

বৃহৎ কণ্টেইনাৰ জাহাজ আৰু অতি বৃহৎ মালবাহী জাহাজ ৰখাৰ বাবে ডিজাইন কৰা এই বন্দৰটো পালঘৰ জিলাৰ দহানুৰ ওচৰত অৱস্থিত ভাৰতৰ অন্যতম বৃহৎ গভীৰ পানীৰ বন্দৰ হ’বলৈ সাজু হৈছে।

এই সুবিধাই আন্তঃৰাষ্ট্ৰীয় জাহাজ পথৰ সৈতেও সংযোগ স্থাপন কৰে, যাৰ ফলত ট্ৰেনজিটৰ সময় আৰু খৰচ হ্ৰাস পায়।

বন্দৰৰ উপৰিও প্ৰধানমন্ত্ৰী মোদীয়ে প্ৰায় ১,৫৬০ কোটি টকাৰ ২১৮টা মীন প্ৰকল্প উদ্বোধন কৰিব, যাৰ লক্ষ্য হৈছে দেশজুৰি মীন খণ্ডৰ আন্তঃগাঁথনি আৰু উৎপাদনশীলতা উন্নীত কৰা।

এই পদক্ষেপসমূহে পাঁচ লাখৰো অধিক নিয়োগৰ সুযোগ সৃষ্টি কৰিব বুলি আশা কৰা হৈছে।

প্রধানমন্ত্রীয়ে প্রায় ৩৬০ কোটি টকা ব্যয় সাপেক্ষে জাহাজ যোগাযোগ আৰু সহায় ব্যৱস্থাৰ নেশ্যনেল ৰোলআউট উন্মোচন কৰিব৷ এই পদক্ষেপে ১৩খন উপকূলীয় ৰাজ্য আৰু কেন্দ্ৰীয় শাসিত অঞ্চলত যান্ত্ৰিক আৰু মটৰচালিত মাছ ধৰা জাহাজত পৰ্যায়ক্ৰমে এক লাখ ট্ৰেন্সপণ্ডাৰ স্থাপন কৰাৰ পৰিকল্পনা কৰিছে।

মীন খণ্ডত অধিক উন্নতিৰ ভিতৰত মীন বন্দৰ আৰু সংহত একুৱাপাৰ্কৰ উন্নয়ন অন্তৰ্ভুক্ত হ’ব। মীন অৱতৰণ কেন্দ্ৰ আৰু বজাৰকে ধৰি মাছ ধৰা আন্তঃগাঁথনি আধুনিকীকৰণ আৰু উন্নীতকৰণৰ প্ৰকল্পও আৰম্ভ কৰিব প্ৰধানমন্ত্ৰীগৰাকীয়ে।