ट्राम्पआ बुङो चीनजों फालांगियारि गोरोबथाया जाथावना

आमेरिकानि हादोरगिरि ड'नाल्ड ट्राम्पआ बुधबाराव बुंदोंमोन दि चीनजों मोनसे फालांगियारि गोरोबथा जाथावनामोन, जेराव हादोरनि हेंथायै बिथांनि बावैसो खाजोनाया बेइजिंजों बांनाय जेंनाखौ सोमजिहोदोंमोन। 

एयार फर्स वानआव खौरां बुथुमगिरिफोरजों रायज्लायनायाव, ट्राम्पआ बुंदोंमोन दि चीनजों मोनसे गोदान फालांगियारि गोरोबथा खालामनाया जाथावनामोन।

बिथांनि बिबुंथिया बे दाननि जागायजेन्नायाव ट्राम्पआ गासैबो चीननि लाबोनायाव 10 जौखोन्दो खाजोना जाबसिननायनि उनाव फैदोंमोन। बे आगानआ बेइजिंनिफ्राय रागा जोंनाय आरो फिन साजा होनाय फालांगियारि राहाफोर लादोंमोन। 

ट्राम्पआ आमेरिकायाव दंफां लाबोनायाव 25 जौखोन्दो खाजोना लानायनि आसाखौबो बांहोदोंमोन, मोनसे आगान जाय जानो हागौ चीननिफ्राय माखासे लाबोनायखौ लाफागोन, जाय कानाडानि उनाव आमेरिकायाव दंफांनि नैथि बयनिख्रुइबो देरसिन जगायग्रा।

बेनि सिगाङाव बुधबाराव, ट्राम्पआ मियामीनि मोनसे जथुम्मायाव बुंदोंमोन दि अट'मबाइल, फार्मासिउटिकेल आरो सेमीकन्डक्टर लाबोनायाव बिथांनि 25 जौखोन्दो खाजोनाखौ दाननि गेजेराव होनाय जागोन।

ALSO READ: तामिलनाडुआव साहा बिलाइनि बेसेननि बेले-बेजेखौ नायनो थाखाय फरायसं

47थि आमेरिकानि हादोरगिरिया गावनि मावख'नि गिबि दानाव गोबां खाजोना होदोंमोन आरो जाबसिनदोंमोन, मानोना बिथाङा आमेरिका-मिरुआरि फालांगियारि एजेन्दाखौ नारसिननो नागिरदों। ट्राम्पआ हाबफैनायनि सायाव गावनि गसंथानायखौ आवगायहोनो थाखाय खाजोनाबो बाहायदोंमोन, जाय कानाडा आरो मेक्सिक'खौ साबसिन सिमा रैखाथिनि थाखाय गोबां बिबानफोरजों सिगिदोंमोन।

ट्राम्पआ बावैसो गाहाय आमेरिकानि फालांगियारि बाहागोआरिफोरनि बेरेखायै पारस्परिक खाजोना जाबसिननो हुमखि होदोंमोन, जायखौ बिथाङा मोजां नङै फालांगियारि हुदाफोर होन्ना सानो, बेखौ सोंखारिदोंमोन।