इजराइल आरो इराननि गेजेराव दावहा दोनथ'नायनि जाहोनाव थावनि बेसेना 1 जौखोन्दोनिबो बांसिन बांदों

थांनाय मोन्नै जथुम्मायाव मख'जाथाव गाहायाव फैनायनि उनाव बुधबारनि फुंआव मुलुगनां गोथां थावनि बेसेना बांदोंमोन। रोंग'साफोरनि बायदिब्ला, हाथाइफोरा इजराइल आरो इराननि गेजेराव रोखा नङै दावहा दोन्थ'नायखौ खाथिनिफ्राय नोजोर होयो, जाय माखासे गिबि सिफायनायनि उनाव सानथावै जानानै थायो। फुंनि 8:15 रिंगासोआव, इन्टारकन्टिनेन्टल एक्सचेन्जआव ब्रेन्टनि आगस्तनि रादायनि बेसेना 68.12 डलार मोनफ्रोम बेरेलमोन, जाय सिगांनि जोबनाय बेसेननिफ्राय 1.37 जौखोन्दो बांदोंमोन। बेबायदिनो, एनवाईएमईएक्सआव वेस्ट टेक्सास इंटरमीडिएट (डब्ल्यूटीआई) नि आगस्तनि रादायआ 1.51 जौखोन्दो बांदोंमोन, जाय मोनफ्रोमबो बेरेलआव 65.34 डलारसिम सौहैदोंमोन।

मंगलबाराव आमेरिकानि हादोरगिरि ड'नाल्ड ट्राम्पआ दावहा दोनथ'नायखौ फोसावनायनि उनाव, बेसेनफोरा बै थाखोसिम गाहायाव फैदोंमोन जायखौ 13 जुनआव इरानआव इजराइलनि गाग्लोबनायनि सिगां नुनो मोननाय जादोंमोन। सप्तानि जोबनायाव इरानाव मोनथाम परमाणु सुबिदाफोराव आमेरिकानि गाग्लोबनायनि उनाव, हरमुज स्ट्रेटआव हेंथा जानो हाथाव जिंगानि जाहोनाव समबाराव बेसेनफोरा मोनबा गोजौ थाखोसिम बांदोंमोन।

ALSO READ: आमेरिकान डलारनि रुजुनायाव रांनि बेसेना 75 फैसा बांनानै 86.03 सिम सौहैबाय

हाथाइफोरा आथिखालाव बेखौ थि खालामनो थाखाय नायगासिनो दं दि दावहा दोनथ'नायखौ लाखिनाय जागोन ना जाया। जदिउबो ईराना गिबियाव मोनसे गोरोबथानि साननायखौ नेवसिगारदोंमोन, तेहरान आरो तेल अवीव मोननैबो अख्रां गाग्लोबनायखौ दोन्थ'नायनि इसारा होदोंमोन। थेवब्लाबो, दावहा दोनथ'नाय सिफायनायनि गोदान रिपर्टफोरा नुजाथिदों, जायनि जाहोनाव वाशिंटननिफ्राय सांग्रांथिनि थाखाय गोदानै आरज गाबनाय जादों।

भारतआ गोजोन गोरोबथाखौ बरायदों

भारत, जाय गावनि गोथां थावनि गोनांथिनि 85 जौखोन्दोनिबो बांसिन लाबोयो - जायनि 36 जौखोन्दोसोआ हरमुज स्ट्रेटखौ दैथायहरो - बेबो डि-एस्केलेशननि थाखाय गावनि मददखौ फोरमायदों आरो ओनसोलारि गोजोन हाबाफारिफोराव मदद होनो जासिदों।

"जों ईरान आरो इजराइलनि गेजेराव दाङाबाजिजों सोमोन्दो थानाय हरसेआव जानाय जाथायफोरनि सायाव नोजोर लाखिगासिनो दं, गुबैयै इराननि परमाणु थावनिफोरनि बेरेखायै आमेरिकाया लानाय हाबाफारिफोर आरो कतरआव आमेरिकानि रौनिया फसंथानफोरनि फारसे इराननि फिन्नाय। जदिउबो जों गोजोर ओनसोलारि रैखाथि आरो दिदोमथिनि गोहोनि बागै गोथौयै जिंगासिनो, नाथाय जों ईरान आरो इजराइलनि गेजेराव दावहा दोनथ'नायनि इसारा होनाय फोरमायथिफोरखौ बाख्नायो आरो बे फिथायखौ सुबिदा खालामनायाव आमेरिका आरो कतरनि नाजानायखौ गनायना लायो, "जेरै बायजो हायुंआरि मन्थ्रि बिफाना बुंदोंमोन।

"जों फिन खेबसेबाव गोसो होनो लुबैयो दि सावरायनाय आरो राजखानथियानो ओनसोलाव गुबुन गुबुन जेंनाफोरखौ सुस्रांनो आरो सुस्रांनायनि मोनसेल' राहा। भारतआ बेफोर नाजानायाव बिहोमा होनो थाखाय थियारि आरो मिजिं थिदों दि गासैबो लोब्बा थानाय दोलोफोरा गोजोर गोजोन आरो दिदोमथिनि थाखाय नाजागोन।

भारतनि गोहो रैखाथिया ओनसोलारि गोजोनजों खाथि सोमोन्दो गोनां। हरमुज चोकपइन्टनि गेजेरजों गोथां थाव रोगानायाव जायखिजाया हेंथा होनाया बेसेनफोरखौ बांहोनो हागौ, बायजोनिफ्राय लाबोनाय खरसाखौ बांहोनो हागौ आरो रांखान्थियाव नारसिननो हागौ।