मेघालयनि प्रीमियाम जिंजारआ दुबाइ हाथाइयाव हाबदों, एक्सपर्ट आसाखौ बांहोदों।

शिलं, 21 मार्च: मेघालयनि प्रीमियाम हायजेंखौ जाफुंसारै दुबाइआव दैथायहरनाय जादों, जाय रायजोनि आबाद सेक्टरनि थाखाय मोनसे गेदेर माइल खुन्थिया। बे जौगानाया आबादारिफोरनि थाखाय हाथाइनि खाबुखौ जौगाहोगोन आरो मुलुगनां मसला फालांगियाव मेघालयनि थाथायखौ गोख्रों खालामगोन होनना मिजिं थिनाय जादों।

मेघालयनि दाइन आबादारिफोरनि मोनसे थान्दै हान्जाया बावैसो गेजेर हायुंआरि फालांगियारि हुदाफोर, बाहायग्रा सायख'नायफोर आरो गुन गोनां मानथाखोफोरखौ सिगांग्रो हमदांनो थाखाय दुबाइआव दावबायहैदोंमोन। बे दावबायनाया बिथांमोननो दिहुन्थाय आरो फाननाय मावखान्थिफोरखौ बांहोनो थाखाय गोनांथार सानथौफोर होदोंमोन, जाय गावसोरनि दिहुनथायफोरखौ मुलुगनां दाबिफोरजों गोरोबहोदोंमोन।

गावनि गोजौ मोदोमनाय, गोबां मोदोमनाय आरो जिबारि गुननि थाखाय मिथिजानाय, मेघालयनि हायजेंखौ गोबाव समनिफ्रायनो बेनि साबसिन आखुथायफोरनि थाखाय बेसेन होबोनाय जायो। बबेखानि, सिमा गोनां हाथाइ सौहैनाय आरो जगायनाय फारि जेंनाफोरा नखरारि हाथायफोरनि बायजोआव बेनि सौहैनायखौ होबथादोंमोन। दुबाइआव बावैसोनि दैथायहरनाया मोनसे जाफुंसारनायखौ दिन्थियो, जाय रायजोनि आबादारिफोरनि थाखाय गोदान खाबु होयो।

मेघालय सोरखारा दैथायहरग्रा एजेन्सिफोर आरो आबादारि हेफाजाबारि आफादफोरनि हेफाजाबाव रायजोनि आबादारि दिहुनथायफोरखौ गुबुन हादोरनि हाथाइफोराव सांग्राङै जौगाहोगासिनो दं। गोजौ गुन गोनां, रासायनारि गैयै मस्लाफोरनि मुलुगनां गोनांथिया बांनायजों, मेघालयनि जिबारि हायजेंआ गेजेर हायुंआरि फालांगिनि थाखाय गोबां खाबु दं।

बे हाबाफारियाव बाहागो लानाय आबादारिफोरा गोदान हाथाइनि खाबुनि सायाव मिजिं थिदोंमोन। "दुबाइनि हाथाइफोराव जोंनि हायजेंखौ नुनाया मोनसे गोग्गाथाव बुब्लि। जों आसा खालामो दि बेयो जोंनि थाखाय गोबां लामा बेखेवगोन, " थान्दै हानजानि सासे आबादारिया बुंदोंमोन।

ALSO READ: माल्टिबेगार मेटल स्ट'कआ दिनै नोजोराव दं, बेयाव मानो दं

गिबि मन्थ्रि कनराड सांमाया ससियेल मिडिया प्लेटफर्म 'एक्स'आव खौरांखौ सेयार खालामनानै बुंदों," बेखौ फोरमायनो मोन्नानै गोजोन्नाय मोनदों दि मेघालयनि प्रीमियाम हायजेंआ बे बोथोराव दुबाइआव थांबाय! मोनसे गोग्गाथाव बुब्लि जेब्ला जोंनि दाइन आबादारिफोरा दुबाइआव दावबायहैदोंमोन, जाय गेजेर हायुंआरि हाथाइफोराव सिगां मोनदांथि मोननो हादोंमोन। बे माइल खुन्थिया साबसिन आयखौ रोखा खालामो आरो मुलुगनां मसला फालांगियाव मेघालयनि जायगाखौ गोख्रों खालामो।

मेघालयआ गोजौ थाखोनि हालदै, गलमुरिच आरो लाकादं हालदै दिहुन्नायनि थाखायबो मिथिजायो, जाय बेसोरनि गोबां कारकुमिन आरो मुलियारि गुनफोरनि थाखाय सिनायथि मोननो हादों। रोंग'साफोरा फोथायो दि दुबाइआव हायजेंनि जाफुंसार दैथायहरनाया रायजोनि बांसिन आबादारि दिहुनथायफोरनि थाखाय गेजेर हायुंआरि हाथाइफोराव हाबनायनि लामाखौ गोरलै खालामनो हागौ।

जेरै-जेरै गोनांथिया बांगोन, बेसादनि गुनखौ लाखिनो आरो दिदोम जगायनायखौ रोखा खालामनो थाखाय लजिस्टिक, पेकेजिं आरो फोरमानलाइयाव रां थिसननाया गोनांथार जागोन। दैथायहरनाय बिथायारि सानजथाइखौ गोख्रों खालामनाय आरो गेजेर हायुंआरि फालांगियारि नेमखान्थिफोरखौ मानिनो थाखाय सोरखारि आरो गावारि मोन्नैबो बाहागोआरिफोरनिफ्राय गोरोबनाय नाजानायनि गोनांथि जागोन।

जेराव जेंनाफोरा थाबाय थायो, मेघालयनि हायजेंखौ दुबाइआव जाफुंसार दैथायहरनाया मोनसे मख'जाथाव आगान, जाय मुलुगनां आबाद फालांगियाव रायजोनि गोहोखौ दिन्थियो।