मेघालय सोरखारा 2028 मायथाइसिम 10 बिलियन डलारनि रांखान्थि बेबस्थानि थांखि लादों: रायजो बेंगिरि

मेघालयनि रायजो बेंगिरि CH विजयशंकरआ आयेन आफादनि रांबावजा जथुमनि गिबि सानाव गावनि बेखेवनाय बिबुंथियाव 2028 मायथाइसिम मेघालयखौ 10 बिलियन डलारनि रांखान्थियाव सोलायनो थाखाय रायजो सोरखारनि रादाइखौ रोखा खालामदोंमोन।

बिजयशंकरआ दोरोङारि गियान आरो गोदान गोदान दिहुनथायनि जथायनायनि गेजेरजों जौगानायखौ बांहोनो थाखाय सोरखारनि बावसोमनायखौ दिन्थियो। बिथाङा रायजोनि धोनि हारिमुआरि उनमोनथाइखौ संरैखा खालामनायजों लोगोसे अरायथा जौगानायखौ मोनफुंनो थांखि लाना हेफाजाब होलायनाय आरो साहसगोनां खामानिनि गोनांथिनि सायाव गोसो होदोंमोन।

रायजो बेंगिरिया बुंदोंमोन दि CM CONNECT आरो हेल' मेघालयजों लोगोसे गुबुन गुबुन हाबाफारिफोर जागायखाबाय, जायनि थांखिया खुंथायखौ साबसिन खालामनाय आरो रायजोनि जिउगोनां हारिमुखौ दिन्थिनाय। बेफोर हाबाफारिफोरा नोगोरारिफोरनि थाखाय सिबिथायफोरखौ मोजाङै खालामनो आरो मेघालयनि रुजुजायै सिनायथिखौ जौगाहोनो थाखाय बिरोंदामिननि मुलाम्फा लायो।

सोरखारा लामा, मोब्लिब, दै जगायनाय, IT, दावबायथाय आरो आबाद बायदि गाहाय सेक्टरफोराव मख'जाथाव दावगादों। मख'जाथाव जौगालु मावथांखिफोरखौ मुलुग बेंक आरो एसियान जौगाखां बेंकजों लोगोसे गोबां हायुंआरि एजेन्सिफोरजों राङारि अनसुंथाइ होनाय जादों। शिलं, तुरा आरो डाइम्पेपआव लामा लुनाय आरो बिथायारि सानज'थाय जौगाथाय बायदि मावथांखिफोरनि थाखाय गासै 395 कौटिसो रां राननायजों रायजोआ PM DeVINE हाबाफारि बायदि बिथांखिफोरनि गेजेरजोंबो थोजासे राङारि अनसुंथाइ मोननो हादों।

रायजो बेंगिरि विजयशंकरआ CM ELEVATE बिथांखिनि जाफुंसारनायखौ नोजोर होयो, जाय आबाद, दावबायथाय आरो गुबुन सेक्टरफोराव फालांगिफोरनि थाखाय साब्सिडी होनानै 2,800 निबो बांसिन मुलाम्फामोनग्राफोरखौ दाजाबारि महरै गोहोम खोख्लैदों।

लामा सेक्टराव बिथाङा शिलं-दावकी राजालामा, तुरा-दालु लामा आरो शिलं सोनाबारि बाइपास बायदि गोनांथार मावथांखिफोरनि दावगानायखौ मुंख'दोंमोन। बेजों लोगोसे, 2,460 कौटि रांनि मेघालय इक'नमिक ग्रोथ करिडर (MEGA) मावथांखिनि थांखिया गासै रायजोआव फोनांजाबनायखौ साबसिन खालामनाय।

निउ शिलं सिटी, स्किल हाब आरो यूनिटी मल बायदि नोगोरारि जौगाखां मावथांखिफोराबो दावगागासिनो दं। बेनि अनगायैबो, स्मार्ट सिटी मिशना शिलंआव मोनसे खौसे कमान्ड आरो कन्ट्रल सेन्टारखौ आबुं खालामनायखौ नुनो मोनदों।

रायजो सोरखारा दावबायथाय, IT आरो बाय'टेक्न'ल'जि बायदि सेक्टरफोरनि थाखाय गोसो बोनो हानाय थुलुंगानायजों सोरखारि-सोरखारि नङि बाहागोदारिफोरनि गेजेरजों रां थिसननायखौ थुलुंगा होगासिनो दं। ओनसोलारि लाइमोनफोरनि मुलाम्फाखौ रैखाथि होनो थाखाय, गोदान दारिमिनफोराव 90 जौखोन्दो सामलायगिरि नङै साख्रिफोरा जायगायारि सुबुंफोरनि थाखाय थिखानाय जागोन।

ALSO READ: बिजिनेस समिटआव आसामआ 5.18 ट्रिलियन रां खाथायनायनि थांखि मोनदों: गिबि मन्थ्रि हिमन्त

मोब्लिब सेक्टराव, रायजो बेंगिरिया खोथा होदोंमोन दि मेघालयआ 2025 मायथाइसिमाव थिखानाय ल'ड शेडिंनिफ्राय उदां जागोन, बिथांखि लानाय बिथायारि सानज'थाय जौगाहोनायनि थाखाय।

रायजो बेंगिरिया रायजोनि आबाद आरो सावस्रि हाबाफारिफोरनि बागैबो खौरां होदोंमोन। खासी मन्डारिन आरो आनारस बायदि गोजौ बेसेननि आबादफोरखौ दैथायहरनाया जाफुंसारनाय नुनो मोन्दों, जेराव दुबाइ आरो मुम्बाइआव दैथायहरनाय जादों। गिबि मन्थ्रिनि रैखाथि गोनां बिमा बिथांखि (CM-SMS)आ फसंथानारि गथ' जोनोम होनाय आरो जोनोम जानायनि सिगांनि जोथोनखौ बांहोनानै बिमा आरो खुदियाफोरनि थैनायनि हारखौ मख'जाथाव महरै बाङाय खालामदों।

जाफुंसार बिसायख'थि खुंनाय आरो आयेनारि खान्थिखौ गोख्रों खालामनायनि थांखिजों गोदान दायगोनां आयेनफोर लाबोनायजों गासै 2024 मायथाइयाव रायजोनि आयेन आरो आब्रुथिनि थासारिया गोजोनै थादोंमोन। रायजो बेंगिरिया आखा-फाखा आयेन बाहायनायखौ रोखा खालामनो थाखाय रायजोनि फरेन्सिक आरो बिजिरनायनि बिथायारि सानज'थायखौ बांहोनायखौबो मुंख'दों।

रायजो बेंगिरिया मेघालयनि नोगोरारिफोरनि गाहाम, रैखाथि आरो जौगानायनि थाखाय सोरखारनि बावसोमनायखौ रोखा खालामना फोजोबदोंमोन।