महाराष्ट्रनि वधवन रुंमा गाथोननि थाखाय 5,700 रांनि रां थिसननाय गोरोबथा

वधवन रुंमा गाथोना समबाराव महाराष्ट्रनि पालघर जिल्लायाव थांखि लानाय सुबिदानि थाखाय 5,700 कौटि रांनि गेदेर गोरोबथायाव सागान होदोंमोन। मिरु शिपिं मन्थ्रि सर्बानन्द सन'वाल आरो रायजो मन्थ्रि शान्तनु ठाकुरनि नुजाथिनायाव सागान होजानाय गोरोबथायाव रासायनिक दिहुनथायफोरनि थाखाय मोनसे बावनाय टर्मिनल आरो लावलाव कार्ग'नि थाखाय मोनसे जुनिया जेटीनि लुनाय दं। 

बे रुंमा गाथोन, जाय भारतनि 13थि बयनिख्रुइबो देरसिन कन्टेनार रुंमा गाथोन जानो थांगासिनो, बेखौ 76,000 कौटि रांनि अनुमान खालामनाय गासै रां थिसननायजों लुनाय जादों आरो बेवहाय मोनगु टार्मिनेल थागोन। बेफोरनि गेजेराव, मोन्नै टार्मिनेलफोरखौ जुनिया महरै लावलाव आरो सोमोन्दोगोनां कार्ग'खौ सामलायनो थाखाय डिजाइन खालामनाय जादों।

गोरोबथाफोरनि गेजेराव मख'जाथावनाया जादों गंसे टार्मिनेल गायसननो थाखाय गान्धार रिफाइनारिफोरजों 4,200 कौटि रांनि रां थिसननाय गोरोबथा जाय गेदेर बिबांनि कार्ग', कन्टेनार आरो लावलाव रासायनफोरखौल' सामलायगोन। 1,000 कौटि रांनि रोखोमसे टार्मिनेल लुनो थाखाय सराफ ग्रुपजोंबो मोनसे गोरोबथा खालामनाय जादोंमोन। 500 कौटि रांनि थाखाय 3 लाख घन मिटारनि गासै गोहोजों मोनसे लावलाव कार्गो जेटी आरो दोन्थुमग्रा टेंक बानायनो थाखाय आईएमसी ग्रुपजों गुबुन मोनसे गोरोबथायाव सागान होनाय जादोंमोन।

ALSO READ: डलारनि बांनायजों भारतारि रांनि फालांगिया लोरबां जायो; 85.27/$ आव गाहायसिनाव खुलियो।

मन्थ्रि सन'वालआ बुंदोंमोन, बे जाहाज गाथोनफोरनि जौगानाया भिजन India@2047 मोनफुंनायाव मदद होगोन। वधावन रुंमा गाथोना हादोरनि जाहाज गाथोन सामलायनाय गोहोखौ थाम गुन खालामगोन होनना साननाय जादों। गाहाय मन्थ्रि नरेन्द्र म'दिआ वाधवनखौ मुलुगनि जौसिन 10 जाहाज गाथोनफोराव लाबोनो सानदों। बे गोरोबथाया बै सिमांखौ जाफुंहोनो थाखाय गोनांथार।

जवाहरलाल नेहरू प'र्ट अथ'रिटि (जे.एन.पि.ए.) आ वधावन प'र्ट प्राइभेट लिमिटेड (वी.पी.पी.एल.) मुंनि मोनसे जुनिया थांखिनि बाहन कम्पानीनि गेजेरजों वाधवन पर्ट मावथांखिखौ जौगाहोगासिनो दं। जेएनपीएनि मासिगिरि उन्मेश वाघआबो बे फालिथायाव दंमोन।

19 जुन, 2024 मायथाइयाव केबिनेटनि गनायथि मोन्नाय बे मावथांखिखौ सोरखारि-सोरखारि नङि बाहागोदारि (पीपीपी) नि गेजेरजों लुनाय टार्मिनेलफोरजों मोनसे न' बिगोमा मडेलनि सिङाव जौगाहोनाय जादों। बे जाहाज गाथोना सोनाबारि सेक्टराव थाखानाय जाहाज गाथोनफोराव नारसिननायखौ खम खालामनानै आरो भारतखौ मुलुगनां शिपिं लामाफोराव मोनसे गोख्रों थासारियाव दोन्नानै भारतनि कार्गो सामलायनाय गोहोखौ बांहोगोन आरो वाधवनखौ गेजेर हायुंआरि लैथोआरि लजिस्टिकआव मोनसे गाहाय न'ड बानायगोन होनना मिजिं थिनाय जादों।