सा-सानजायाव गोख्रैसिन इन्टारनेटनि थाखाय भारतनि नारसिननाया बांग्लादेशआ

गोदान दिल्ली: सा-सानजायाव गोख्रै इन्टारनेट सौहैनायनि थाखाय भारतनि नारसिननाया मुहम्मद युनुसनि दैदेन्नाय गेजेरारि सोरखारा आगुनि शेख हसीना खुंथायनि मोनसे थिरांथाखौ सोलायनायजों मोनसे हेंथानि मोगा-मोगि जानांदों, जाय गावारि टेलिकम अपारेटरफोरखौ फोनांजाबनाय-फेरफाथिनाय ओनसोलाव बेन्डविड्थ जगायनो थाखाय बांग्लादेशखौ ट्रान्जिट पइन्ट महरै बाहायनो गनायथि होदों।

युनुस सोरखारनि बे गोदान आगानखौ पाकिस्तानजों सोमोन्दोखौ गोख्रों खालामनायजों लोगोसे भारतनि मुलाम्फाफोरखौ गाज्रि खालामनो लानाय गोबां आगानफोरनि गेजेराव मोनसे महरै नायनाय जादों।

बे थांखियाव त्रिपुरायाव भारत आरो बांग्लादेशनि गेजेराव अखौरा सिमाखौ सिंगापुरनिफ्राय भारती एयारटेलनि नेटवर्कनि गेजेरजों खोला-सानजा एसियाजों फोनांजाबनो थाखाय मोनसे ट्रेन्जिट लामा महरै बाहायनाय दंमोन।

भारतनि सा-सानजाया नखरारि फाइबार अप्टिक नेटवर्कखौ बाहायनानै चेन्नाईआव साबमेरिन केबोलनि गेजेरजों सिंगापुरजों फोनांजाबनाय। चेन्नाईनि लेन्दिं स्टेशनआ सा-सानजानिफ्राय फ्राय 5,500 किल'मिटार गोजानाव, बेनिखायनो इन्टारनेटनि गोख्रैथिया गोरोबलायो।

बेजों लोगोसे, सा-सानजानि हाजोआरि ओनसोलाबो फाइबार अप्टिक नेटवर्कखौ सामलायनाय आरो गोदान नेटवर्क फज'नायखौ गोब्राब खालामो, जायनि जाहोनाव जायखिजाया जेंनानि समाव गोबाव समसिम ब्लेकआउट जायो।

आथिखालाव होखारजानाय हसीना सोरखारजों लाजानाय थिरांथाखौ बोखारनो बांग्लादेशनि थिरांथाया भारतनि बायजोआरि नेहाथारि बिक्रम मिस्रीनि समबारखालि ढाका दावबायनायनि साननैसो सिगां फैदोंमोन।

बांग्लादेश टेलीकमिउनिकेसन रेगुलेटरि कमिसनआ (BTRC) दाबि खालामदोंमोन दि बे राहाया हादोरनि ओनसोलारि इन्टारनेट मिरु जानो हानाय गोहोखौ खहा खालामगोन आरो मुलुगनां खारि सोलाय-सोल' नेटवर्कआव बेनि गोहोमखौ खम खालामगोन।

फेब्रुवारियाव, समिट कम्युनिकेशन्स लिमिटेड आरो Fiber@Home - बांग्लादेशनि सानै गाहाय टेलिकम गेलेगिरिफोरा सिंगापुरनिफ्राय बांग्लादेशनि गेजेरजों भारतनि सा-सानजा रायजोफोराव बेन्डविड्थखौ चेनेल खालामनो थाखाय BTRC निफ्राय गनायथि बिदोंमोन।

बे थांखियाव भारती एयारटेलनि नेटवर्कनि गेजेरजों खोला-सानजा एसियाजों ओनसोलखौ फोनांजाबनो थाखाय अखौरा सिमाखौ मोनसे ट्रेन्जिट लामा महरै बाहायनाय दंमोन।

ALSO READ: आसामआ माइरंनि सायाव बिथा खालामना इथेनाल दिहुन्नायनि थाखाय थुलुंगा होनो फोसावदों

बबेखानि, बीटीआरसीनि आफादगिरि मुहम्मद इमदाद-उल-बारीआ बे सप्तायाव बुंदोंमोन दि आय'गआ बे थांखिखौ बोखारनो थिरांथा लादोंमोन जेब्ला जिंगा सिखांनाय जादोंमोन दि बेबादि आगानआ ओनसोलारि इन्टारनेट मिरु महरै भारतनि थाथायखौ गोख्रों खालामगोन आरो बांग्लादेशनि मुलुगनां डिजिटेल सानज'थायाव मोनसे गोनांथार गेलेगिरि महरै नुजाथिनो हानाय गोहोखौ सिमा गोनां खालामगोन।

ओनसोलारि खौरां बिजों रिपर्टफोराव बुंनाय जादों दि बे गोरोबथाया मेटा, गुगल आरो एमेजन बायदि गाहाय मुलुगनां कन्टेन्ट डिलीवरी नेटवर्क (CDN नि थाखाय पइन्ट अफ प्रेजेन्स (POP) महरै खामानि मावनो बांग्लादेशनि हाबिलाखौ हेंथा होनो हुमखि होदोंमोन।