आसाम: IIT गुवाहाटीआ सिमा नायदिंनायनि थाखाय AI-ड्रिभेन रब'ट जौगाहोदों

गुवाहाटी, 24 मार्च: भारतारि बिरोंदामिन फसंथान (IIT) गुवाहाटीनि बिजिरसंगिरिफोरा सिमा नायदिंनायाव जांख्रिथाय लाबोनो थाखाय डिजाइन खालामजानाय गोदानथार AI-गोहोगोनां रब'टफोर जौगाखां होदों। IIT गुवाहाटीआव इनक्युबेट खालामजानाय मोनसे स्टार्टअप दा स्पेशिय' र'ब'टिक लेबरेट'रि प्राइभेट लिमिटेड (DSRL) जों बानायजानाय रब'टफोरा भारतनि रैखाथि बिथायारि सानज'थायाव गावसोरनि जाथावना बाहायनायनि थाखाय रैखाथि बिजिरसं आरो जौगाथाय आफाद (DRDO)निफ्राय सिनायथि मोनदों। भारतारि रौनिया हानजाया आथिखालाव गोदानथार नायदिंनाय खान्थिनि फील्ड ट्राइल खालामगासिनो दं।

DSRL नि CEO अर्नब कुमार बर्मना बेखेवना होदोंमोन दि बे गावखुंथायारि रब'टफोरा दोरोङारि सिमा रैखाथि आदबफोर जेरै ड्रन, स्टेशनारि केमेरा आरो मेनुयेल पेट्रलफोराव मख'जाथाव जौगानाय होयो। रबटफोरखौ गोब्राब ओनसोलफोराव नेभिगेट खालामनो, हेंथाफोरजों गोरोबहोनो आरो AI जों सालायजानाय नायदिंनायजों सोलिबाय थानाय नंगुबै-सम नायदिंनाय होनो थाखाय डिजाइन खालामनाय जादों, जाय गासैबो बोथोरनि थासारिफोराव 24/7 नायदिंनायखौ रोखा खालामो।

बर्मनआ बुंदोंमोन, जोंनि खान्थिया हादोरनि जौगाबोनाय रैखाथि गोनांथिफोरखौ सुफुंनाय, 24 घन्टा सांग्रांथिखौ रोखा खालामनो थाखाय डिजाइन खालामनाय जादों। "जों रैखाथि बिरोंदामिनआव भारतनि गाव-सोनारनायाव बिहोमा होनायाव गोग्गानाय मोनो आरो सोलिबाय थानाय गोदान दिहुनथायनि थाखाय रादाय होयो।"

AI जों सालायजानाय रब'टफोरा जानोहाथाव खैफोदफोरखौ हमदांनो आरो गोहोम गैयै खालामनो थाखाय माल्टि-सेन्सर इन्टेलिजेन्सजों सुजुजानाय, जाय बिसोरखौ गोनांथार बिथायारि सानज'थाय नायदिंनाय आरो सिमा रैखाथिनि थाखाय साबसिन बानायो।

ALSO READ: RVNL नि स्टकआ रेकर्ड गोजौनिफ्राय 42 जौखोन्दो गोग्लैयो; बेसेन बायनाय ना गोग्लैनाय धुमकेतु?

IIT गुवाहाटीनि टेक्न'ल'जि इनक्यूबेशन सेन्टारनि गाहाय केयुर सोरथियाआ बे दावगानायनि गोनांथिखौ नोजोर होनानै बुंदों, "बे बिरोंदामिनआ न'आवनो बानायनाय राहाफोरनि गेजेरजों रैखाथि गोदान दिहुनथायाव भारतनि बांलांनाय गोहोनि बिदिन्थि होयो।"

गोदान खान्थिया दुथां ड्र'न आरो हाबफैनो नाजानायजों लोगोसे गोदान रैखाथि खैफोदफोरखौ फोजोबनायाव गोनांथार बिफाव लागोन होनना मिजिं थिनाय जादों, जाय जौगानाय, हादोरारि बिरोंदामिनजों भारतनि सिमाफोरखौ आरोबाव गोख्रों खालामगोन।