गुजनि 1थि सेमिकन्डक्टर प्लान्टखौ सुरतआव बेखेवनाय जादों

मिरु दै फुंखा मन्थ्रि सीआर पाटिलआ रबिबाराव सुरतनि पलसानायाव गुजरातनि गिबिसिन सेमीकन्डक्टर प्लान्टखौ बेखेवदोंमोन। सुची सेमिकननि प्लान्टहा सानफ्रोमबो 3 लाख चिप्सनि दिहुनथाय गोहो थागोन आरो बेयो 30,000 बर्ग फुट ओनसोलाव गोसारनाय। बे प्लान्टखौ 840 कौटि रां थिसननायजों गायसननाय जादों।

बेखेवनाय समाव, पाटिलआ बुंदोंमोन दि इलेक्ट्रनिक्स बानायनायनि थाखाय बयनिख्रुइबो गोनांथारसिन गोथां मुवा आरो डिजिटेल जांख्रिथायनि थाखाय गोनांथार बेयो सेमिकन्डक्टर। पाटिलआ बुंदोंमोन, "रायजोनि फालांगियारिफोरा गुजराताव बेबादि दिहुनथायफोर बानायनो थाखाय ज' जागासिनो दं आरो खालि भारतनि थाखायल' नङा, मुलुगनोबो सेमिकन्डक्टरफोर जगायगासिनो दं"। बिथाङा बुंदोंमोन दि क'भिडनि उनाव, सुचि सेमिकनआ प्लान्टखौ गायसनदोंमोन आरो जोबोद खम समनि गेजेरावनो प्लान्टखौ बाहायहोदोंमोन।

सुची सेमीकननि गायसनगिरि अशोक मेहताखौ बरायनानै पाटिलआ बुंदोंमोन दि मेहताया गावनि केरियारखौ 1500 रांनि साख्रिजों जागायजेन्दोंमोन, "दिनै बिथांनि सेमीकन्डक्टर प्लान्टआव 1500 गोरों इलेक्ट्रनिक इन्जिनियारफोरखौ थिसननाय जादों," पाटिलआ बुंदोंमोन।

गुजरातीफोरा गाहाइ मन्थ्रि मदिनि नोजोरखौ मोगथाङाव जाफुंसारहोनो हागोन: संघवी

नखर आरो दारिमिन रायजो मन्थ्रि, हर्ष सांघवी, जाय बेखेवनायनि समाव दंमोन, बुंदोंमोन, "गुजरात आरो गुजरातीफोरनाव भारतखौ सेमीकंडक्टर सेक्टराव आत्मनिर्भर खालामनायनि गाहाइ मन्थ्रि मदीनि नोजोरखौ मोगथाङाव जाफुंहोनो हानाय गोहो दं, जायखौ सुची ग्रुपआ फोरमान खालामदों। गुजराता दारिमिनारि जौगाथाय आरो गोदान दिहुनथायखौ जौगाहोनायाव जेब्लाबो सिगांसिनाव थाबोदों।

ALSO READ: फेड रेटनि थिरांथानि सिगां थावनि बेसेना एसे सोलायदों

सुचिनि गायसनगिरि अशोक मेहताया बुंदोंमोन, "जों फारियै नै बोसोरसिम बिजिरसंनाय आरो बिजिरनाय खालामदोंमोन आरो बोसोरसेआव प्लान्टनि लुनायखौ फोजोबनायनि सिगां 12 हादोरफोराव दावबायदोंमोन।" बिथांनि फिसाज्ला शेतलआ बुंदोंमोन, "सेमीकन्डक्टर चिप्सखौ मोनसे जायगायारि कम्पानियाव मुलुगनां मानथाखो बायदियै बानायनाय जागोन। जों फैगौ बा बोसोराव 1200 गोदान साख्रि होगोन।