छत्तीसगढ़आ नया रायपुराव 1,143 कौटि रांनि सेमिकन्डक्टर इउनिटनि खामानिखौ जागायजेनबाय

छत्तीसगढ़आ सुक्रुबाराव नया रायपुराव मोनसे गोदान सेमीकन्डक्टर बानायग्रा आरो पेकेजिं इउनिट लुनायखौ जागायजेनो। बे इउनिटखौ भारतनि गिबिसिन सेमीकन्डक्टर चिप दिहुनग्रा प'लिमाटेक इलेक्ट्रनिक्सआ फैगौ बा बोसोराव 1,143 कौटि रां थिसननायजों गायसननाय जादों। गिबि मन्थ्रि बिष्णु देव साईआ फुंनि 11:30 रिंगायाव अन्थाइ खाम्फा गायसनो। बे मावथांखिया गोबां बिबांनि रां थिसननाय लाबोगोन, साख्रि सोरजिगोन आरो छत्तीसगढ़खौ मुलुगनां इलेक्ट्रनिक्स जगायनाय फारिजों सरजाबगोन होनना मिजिं थिनाय जादों।

बे फोसावनाया रायजोनि थाखाय मोनसे मख'जाथाव आगान मानोना बेयो गोजौ आरोंदायारि दारिमिनफोरनि थाखाय मोनसे थावनि जानो नाजादों। "छत्तीसगढ़आ गोजौ आरोंदायारि दारिमिनफोरनि थाखाय मोनसे थावनि महरै इयुनाव फोथायनायजों आगान होगासिनो दं। नवा रायपुराव सेमिकन्डक्टर दिहुनग्रा इउनिटनि गायसननाया मोनसे गोदान रां थिसननायल' नङा - बेयो जोंनि रायजोनि जौगा बिरोंदामिन आरो गोदान दिहुनथायखौ दैदेननो थाखाय साखा-फारानि मोनसे गोहोगोरा इसारा। बे सुबिदाया गोजौ बेसेननि साख्रि सोरजिगोन, आरोंदायारि रोंग'थिखौ बांहोगोन आरो गेजेर भारताव मोनसे गोख्रों इलेक्ट्रनिक्स सोरबिथिं खान्थिनि जौगाथायखौ थुलुंगा होगोन," विष्णु देव साईआ बुंदोंमोन।

तामिलनाडुनि कम्पानिजों सावरायनाया नबेम्बर 2024 मायथाइयाव जागायजेन्दोंमोन। पॉलीमटेकनि सामलायगिरि बिथोनगिरि आरो गाहाय मावफुं मावख'गिरि ईश्वर रावआ 20 दिसेम्बराव रायजोआव दावबायहैदोंमोन आरो 23 दिसेम्बराव दिल्लीयाव छत्तीसगढ़ इनवेस्टर कनेक्ट हाबाफारिनि समाव मोनसे नेमखान्थियारि थांखि गथायदोंमोन। दानथामनि गेजेराव, सोरखारा हा आरो खामानिखौ जागायजेन्नो थाखाय गोनां गनायथिफोरखौ थि खालामो।

बे प्लान्टआ 150,000 बर्ग फुट गोलाव जागोन आरो बेयाव साखोन-सिखोन खथा, एयार कन्डिशनिंग आरो 24 घन्टा मोब्लिब गोहो बायदि सामलायजानाय आबहावाफोर थागोन। मोनसे आबुं बेक-अफिस इउनिटबो बिथांखि लानाय जादों। सोरखारा एन.आर.डी.ए.नि टेन्डार बिखान्थिनि गेजेरजों नया रायपुरनि सेक्टर 5 आव 45 साननि गेजेराव हा राननायखौ फोजोबदोंमोन। फैगौ 25 साननि गेजेराव लीज रेबथुमनायखौ खालामनाय जादोंमोन।

ALSO READ: जि.एम.सि.आ दै, सम्पथि आरो फालांगियारि सिबिथायफोरनि थाखाय गाहाय फोसाबनायफोरखौ बेखेवदों

रांखान्थि मन्थ्रि अ.पि. चौधुरीया बुंदोंमोन दि बे मावथांखिया 2025-26 मायथाइनि रायजोनि रांबावजायाव फोरमायनाय मोनसे गिदिर नारसिननायनि बाहागो। "विष्णु देव साईनि दैदेन्नायाव जोंनि 2025-26 मायथाइनि रांबावजायाव समायखिरा लानाय बायदियै, जीएटीआई - मोजां खुंथाइ, गोख्रैथि बिथायारि सानजथाइ, बिरोंदामिन आरो दारिमिनारि जौगानायखौ थुलुंगा होनाया बयनिख्रुइबो गोनांसिन। बे जौगानाय सेमिकन्डक्टर प्लान्टआ जोंखौ थोंजोङै बै लामायाव लाबोनो थांगासिनो दं। बेयो खालि गोजौ बेथन मोन्नाय साख्रिखौल' जौगाहोनाय नङा, नाथाय रासायनारि मुवा, धातुफोर आरो साखोन-सिखोन खालामग्रा आगजुफोर बायदि हेफाजाबारि दारिमिनफोरखौबो जौगाहोगोन। बेयो रायजोआव गोबां एफ.डि.आइ.खौबो हांख्रायगोन जाय रायजोनि गासै जौगानायाव बिहोमा होगोन।

मानगोनां चिप इउनिटफोरनि उल्था, जाय नख'रारि इलेक्ट्रनिक्सआव बाहायजानाय माइक्र'कन्ट्र'लार आरो बाहागोफोर दिहुनो, गोदान कारखानाया 6जी आरो 7जी टेलीकम, मबाइल फन, डाटा ट्रेन्समिसन आरो पावार इलेक्ट्रनिक्स बायदि गोजौ थाखोनि सेक्टरफोराव बाहायजानाय चिप्स बानायगोन। प'लिमाटेकआ 2030 मायथाइसिमाव बोसोराव 10 बिलियन चिप्स दिहुन्नो थांखि लादों। प्लान्टआ 28nm आरो 45nm बायदि गोजाम न'डफोरनि जायगायाव 7nm, 5nm आरो 3nm बायदि जौगा बिरोंदामिन न'डफोरखौ बाहायगोन।

बे हाबाफारिया मिरुनि "मेक इन इन्डिया" आरो "डिजिटेल इन्डिया" थांखिफोरखौ मदद होयो। जायगायारि सेमिकन्डक्टर दिहुन्थाया दारिमिनारि दिहुनथायाव मख'जाथाव बेसेन दाजाबदेरना होयो। बेयो इन्जिनियारफोर, बिजिरसं आरो जौगाथाय आरो टीएसएमसी आरो इन्टेल बायदि मुलुगनां बिरोंदामिन फार्मफोरजों बाहागोदारिफोरनि गोनांथिबो सोमजिहोयो। बे इउनिटआ थोंजोङै गुबुन हादोरारि रां थिसननायखौ गोसो बोनो हागोन आरो सोरखारि साब्सिडी आरो अनसुंथाइनि थाखाय रोंग'थि गोनां जागोन होनना मिजिं थिनाय जादों।