आसामआ ब्रह्मपुत्र भेली फार्टिलाइजार कर्प'रेसन लिमिटेडआव 40% बाहागो लागोन

गुवाहाटी: रायजो केबिनेटआ नामरुपआव थानाय मोनसे मिरुआरि PSU ब्रह्मपुत्र भेली फार्टिलाइजार कर्परेशन लिमिटेड (BVFCL) आव 40 जौखोन्दो बाहागो लानो थिरांथा लायो। बे बाहागोनि थाखाय रायजो सोरखारनो फ्राय 4,000 कौटि रांनि गोनांथि दं।

दिनै केबिनेट जथुमनि उनाव खौरां बिजोंनि सिगाङाव गिबि मन्थ्रि हिमन्त बिश्व सर्माया बुङो, "नामरुपआव BVFCL खौ फोथांफिन्नायनि सायाव गोबाव समनिफ्रायनो सावरायनाया सोलिगासिनो दं। हासार कम्पानीनि ब्रैथि इउनिट गायसननायनि सायावबो सावरायनाय जादोंमोन। आं मानगोनां गाहाय मन्थ्रिखौ फेब्रुवारि 2025 मायथाइनि सिगां नामरुप हासार कम्पानिखौ फोथांफिन्नायनि सायाव थिरांथा लानो खावलायदोंमोन। गाहाय मन्थ्रिआ मिरुआरि रांखान्थि मन्थ्रिखौ हासार कम्पानिखौ फोथांफिन्नो लामा नागिरनो बिबान होदोंमोन। दायो बेखौ फोथांफिन्नो थाखाय मोनसे DPR (गुवारै मावथांखि फोरमायथि) थियारि खालामनाय जादों। हासार कम्पानिखौ फोथांफिन्नो थाखाय 10,601 कौटि रां थिसननायनि गोनांथि दं। मिरु सोरखारा जोंनो गांसे लाइजाम लिरनानै बुंदोंमोन दि जुदि रायजो सोरखारा कम्पानिनि 40 जौखोन्दो बाहागो लायो, अब्ला मिरुआ बेखौ फोथांफिन्नो आवगायलांगोन। दिनैनि केबिनेटआ BVFCL आव 40 जौखोन्दो इक्विटी लानो मख'जाथाव थिरांथा लादों। हासार कम्पानिनि ब्रैथि इउनिटनि खामानिया दानो जागायगोन। कम्पानियाव रायजो सोरखारनि रां थिसननाया 4,000 कौटि रां जागोन, जाय आसाम बायदि रायजोनि थाखाय मोनसे सोमोनांथाव रां थिसननाय।

केबिनेटआ साहा गुवाहाटीनि रंगमहलआव मोनसे न्यायारि टाउनशिपनि थाखाय 75 बिघा हा आवग्रिनो थिरांथा लायो। केबिनेटआ हा आरजिनायनि थाखाय 80 कौटि रांखौ गनायथि होदोंमोन। गिबि मन्थ्रिआ बुंदोंमोन दि गुवाहाटी गोजौ बिजिरसालिनि गोदान केम्पासआ साहा गौहाटीयाव जागोन।

मिशन बसुंधरा 3.0 नि सायाव बिथाङा बुंदोंमोन, "दिनैनि केबिनेटआ सोलोंथायारि, धोरोमारि आरो हारिमुआरि फसंथानफोर बायदि फसंथानफोरजों रेबथुमनायनि फोरमानलाइ, ट्रास्ट डिड बायदि फोरमानफोरखौ गोनांथार महरै गथायनाय गैयाजासे मिशन बसुन्धरा 3.0 नि सिङाव हाफोरखौ राननाय एबा थिसननायनि थाखाय आरजलाइ गथायनो गनायथि होदों। बबेखानि, जेब्ला सोरखारा बिसोरनो हा मिमांसा होगोन अब्ला बेबादि आफादफोरा गावसोरनि रेबथुमनाय फोरमानलाइफोरखौ गथायनांगोन। मिशन बसुन्धरा 3.0 नि थाखाय आरजलाइ गथायनाया 31 दिसेम्बर, 2024 खालि बन्द जागोन। बे केबिनेट थिरांथाजों, क्लाब, नामघर, सोलोंथायारि फसंथान बायदिफोरा सोरखारि रेबथुमनाय फोरमानलाइ गैयाजासे मिशन बसुन्धरानि सिङाव मिमांसा खालामनो थाखाय आरज गाबनो हागोन।

रायजोनि मोनद' जिल्लाफोराव गामियारि फोनांजाबनायखौ जौगाहोनो थाखाय केबिनेटआ 81 कौटि रांनि 14 गामियारि लामा मावथांखिफोर लुनो गनायथि होदोंमोन।

केबिनेटआ भारत सोरखारनि एकाउन्टिं स्टेन्डार्ड (IGAS) -4 नि राहाफोरजों गोरोबनानै APDCL , AEGCL  आरो APGCL नो रायजो सोरखारनि दाहार आरो अनसुंथाइफोरखौ इक्विटीआव सोलायनो गनायथि होयो।

ALSO READ: SEBI आ रां थिसननाय जाख्ल'नायनि थाखाय 19 लाखनि बांसिन

बे समावनो मैया राजभबननि मोखाङाव जानाय जाथायनि सायाव बिबुंथि होनानै गिबि मन्थ्रिआ बुङो, "कंग्रेसआ थांनाय साननैसोनिफ्राय गुवाहाटीआव जाथाय सोमजिहोनो नाजागासिनो दं। मैयाया कंग्रेसनि ब्रैथि नाजानायमोन। जेब्ला कंग्रेसआ हेंथा दिन्थिफुंदोंमोन अब्ला रायजो बेंगिरिया मणिपुराव दंमोन। बिथांमोनहा बेरिकेडफोरखौ सिफायनो नाजादोंमोन। जेब्ला रायजो बेंगिरिया स्टेसननि बायजोआव दंमोन, अब्ला बिसोरखौ मानि जाहोनाव बेबादि दावराव-दावसि खालामदोंमोन? बिसोरनि सानथांखिया पुलिसखौ गुलि गावहोनायमोन। बबेखानि, खाफाल गोनांदि मोदै गग्रा गेसआ थासारिखौ सुग्लायहोदोंमोन। सोरखारा दायनिगिरिफोरनि बेरेखायै राहा लागोन।

गिबि मन्थ्रिआ दिनै संसदनि मोखाङाव नागालेन्डनि सासे आइजो एम.पि.नि खाथियाव फैनायनि थाखाय कंग्रेस दैदेनगिरि राहुल गान्धीनिफ्राय निमाहा बिनो दाबि दैखांदों।