आसाम बाजेट 2025: साख्रिआवलाफोर, आबादारिफोर आरो साहा बागाननि मावथिफोरनि थाखाय गाहाय हेफाजाब

गुवाहाटी,मार्च 10: आसामनि रां बिफान्नि मनट्री अजन्ता नेवगआ सरकारि मावफारियाफोर, आबादारिफोर आरो साहा बागानाव खामानि मावग्राफोरखौ मुलाम्फा होनायनि थांखिजों गोनांथार राहाफोर लाबोनानै 2025 माइथायनि थाखाय हादोरसानि रांबावजा थिसनो। रांबावजाया पेन्सन फोसाबनाय, राङारि हेफाजाब, बीमा कभारेज आरो आबाद सेक्टरनि थाखाय मददनि सायाव गोसो होयो।

गाहाय फोसाबनायफोरनि गेजेराव मोनसेआ आरजाथाव सोरखारि मावफारियाफोरनि थाखाय गोदान पेन्सन बिथांखि (NPS) नि सिङाव गोजाम पेन्सन बिथांखि (OPS) मुलाम्फाफोरखौ फोलावनाय, जाय 2.8 लाखसो मावसाफोरखौ गोहोम खोख्लैयो।

अक्ट'बरनिफ्राय साफ्रोम रेशन कार्ड गोनांफोरा रायजोनि हेफाजाबनि बाहागो महरै 1 किल'ग्राम दालि, 1 किल'ग्राम सिनि आरो 1 किल'ग्राम संख्रि मोनगोन, आरो मोजां बेसेननि गलाफोरनि गेजेरजों हाबाफारिनि सुबिदानि थाखाय 370 कौटि रां थिखानाय जागोन।

आसामनि साहा बागाननि मावदांसाफोरखौ हेफाजाब होनो थाखाय, सरासनस्रा नङै आरो अरायथा मोन्नैनिबो थाखाय, सोरखारा 6.8 लाख मावसाफोरनो खेबसे 5,000 रां राङारि हेफाजाब होगोन। बे हाबाफारिनि थाखाय गासै 342 कौटि रां थि खालामनाय जादों।

बेजों लोगोसे, मोनसे गोदान लाथिख'-बेसेननि जाब्रबथाय आरो थैनाय बीमा बिथांखिया गासिबो थिखानाय मावफारियाफोर आरो फालांगियारि बेंकफोरनि गेजेरजों बेथन मोन्नाय रायजोआरि सेक्टरनि मावसाफोरखौ लाफागोन।

सोलोंथायखौ जौगाहोनो थाखाय, रांबावजायाव सोरजिलु बिगियान आरो सोलोंथायाव बिहोमा होग्रा सासे लाइमोन लिरगिरिनि थाखाय ₹25,000 राङारि हेफाजाब दंफायो। सोरखारि मावख'गिरिफोरा बिजाब बायनो थाखाय 1,000 रांबो मोनगोन, आरो नोगोरारिफोरखौ जर'खा फालिथायफोराव बिजाबफोर अनथोब होनो थाखाय थुलुंगा होनाय जायो।

ALSO READ: मुलुगनां फालांगियारि जेंनानि थाखाय भारतारि रांआ 39 फैसा खम

आबादारिफोरनि थाखाय, सोरखारा माय आरो जुखामनि थाखाय कुइन्टेलसेआव 250 रां आरो बेसरनि थाखाय कुइन्टलसेआव 500 रां लाफानानै गाहाय आबादफोरखौ हेफाजाब होनो थाखाय थोंजोङै राङारि अनसुंथाइ होनो थांखि लादों।

रांबावजायाव मोनसे जारिमिनारि थिरांथायाव डिब्रुगढ़आव गोदान आयेन आफाद न' आरो MLA हस्टेल लुनो थाखाय 200 कौटि रां राननाय नुनो मोनो, जाय मावख'आरि महरै बेखौ आसामनि नैथि राजथावनि महरै गनायथि होयो।

बेफोर राहाफोरा आसामनि समाजारि-रांखान्थियारि दाथायखौ गोख्रों खालामनो आरो मावफारियाफोर, आबादारिफोर आरो साहा बागाननि मावसाफोरनो गोनांथार हेफाजाब होनो थाखाय रायजो सोरखारनि नाजानायनि बाहागो।