হস্ততাঁত আৰু বস্ত্রশিল্প সঞ্চালকালয়ৰ উদ্যোগত দশম ৰাষ্ট্ৰীয় হস্ততাঁত দিৱস উদযাপন

আজি ১০ম ৰাষ্ট্ৰীয় হস্ততাঁত দিৱসৰ উদযাপন কৰা হয় খানাপাৰাৰ অসম প্রশাসনীয় পদাধিকাৰী মহাবিদ্যালয়ৰ সভাকক্ষত, য’ত আয়োজক আছিল অসম চৰকাৰৰ হস্ততাঁত আৰু বস্ত্রশিল্প সঞ্চালকালয়। এই অনুষ্ঠানত প্ৰসিদ্ধ অতিথিসকল উপস্থিত হৈছিল আৰু হস্ততাঁত পৰম্পৰাৰ সংৰক্ষণৰ গুৰুত্ব সুঁৱৰি দিয়া হয়। এই অনুষ্ঠানত মুখ্য অতিথি হিচাপে উপস্থিত আছিল হস্ততাঁত, বস্ত্ৰশিল্প, ৰেচম, ভূমি সংৰক্ষণ আৰু বড়োলেও কল্যাণ মন্ত্ৰী উৰ্খাও গৌৰা ব্রহ্ম। সন্মানীয় অতিথি হিচাপে অংশগ্ৰহণ কৰে জনস্বাস্থ্য কাৰিকৰী, দক্ষতা, নিয়োগ আৰু উদ্যমিতা আৰু পর্যটন মন্ত্ৰী জয়ন্ত মল্লবৰুৱা। বিশেষ আমন্ত্ৰিত অতিথি হিচাপে উপস্থিত আছিল পদ্মশ্ৰী আৰু অসম গৌৰৱ বঁটা প্ৰাপক বিশিষ্ট বয়নশিল্পী হেমপ্ৰভা চুতীয়া। মন্ত্ৰী ব্রহ্মৰ ভাষণত, অসমৰ ঐতিহ্য আৰু সংস্কৃতি ৰক্ষাৰ বাবে হস্ততাঁতৰ সংৰক্ষণৰ গুৰুত্ব বৰ্ণনা কৰে। তেওঁ কয়, "আমাৰ ঐতিহ্য আৰু সংস্কৃতি ৰক্ষাৰ বাবে হস্ততাঁতক ৰক্ষা কৰিবই লাগিব। অতীতত, হস্ততাঁত আৰু বস্ত্ৰশিল্পৰ ব্যৱহাৰ ঘৰে ঘৰে আছিল। এতিয়া এই চাহিদা পুনৰ বৃদ্ধি পাইছে। বৰ্দ্ধিত চাহিদাৰ প্ৰতি লক্ষ্য ৰাখি বিভাগটোৱে বহু নতুন পৰিকল্পনা হাতে লৈছে।" মন্ত্ৰী জয়ন্ত মল্লবৰুৱাই হস্তশিল্প আৰু কুটীৰ শিল্পৰ বৃদ্ধি পাই থকা চাহিদাৰ বিষয়ে কথা ক’লে। তেওঁ উল্লেখ কৰে যে, "হস্তশিল্প আৰু কুটীৰ শিল্পৰ চাহিদা যথেষ্ট বাঢ়িছে। 

আমি নিশ্চিত কৰিব লাগিব যে আমাৰ শিপিনীসকলে তেওঁলোকৰ তাঁতশালত থাকিব। মুখ্যমন্ত্ৰী মহোদয়ে 'স্ব-নিৰ্ভৰ নাৰী'ৰ দৰে আঁচনি লৈছে। আমি স্বাৱলম্বীতাৰ ওপৰত গুৰুত্ব আৰোপ কৰিব লাগিব। আমি হস্ততাঁতৰ বৈশিষ্ট্য ৰক্ষা কৰি কম খৰচত সামগ্ৰী উৎপাদন কৰিবলৈ চেষ্টা কৰিব লাগিব। আমি সনাতনভাৱে দক্ষ শিপিনীক পেছাগতভাৱে কেনেকৈ দক্ষ কৰিব পাৰো তাৰ বাবে চেষ্টা কৰিব লাগিব।" মল্লবৰুৱাই যোগ কৰিলে, "আমিয়ে এতিয়া উপভোক্তা জাতি হৈ পৰিছোঁ। উৎপাদনশীল কামত জড়িত হ'লেহে আমি আগবাঢ়িব পাৰিম।

ৰাজ্যখনক ভাৰতৰ আগশাৰীৰ ৰাজ্য হিচাপে গঢ় দিব পাৰিম।" বিশিষ্ট বয়নশিল্পী হেমপ্ৰভা চুতীয়াই উল্লেখ কৰে যে, সাম্প্ৰতিক সময়ত তাঁতশালৰ অবহেলা কৰা হৈছে। তেওঁ বাহিৰৰ পৰা অহা গামোচাৰ বিক্ৰী অসমত সম্পূৰ্ণৰূপে বন্ধ কৰিবলৈ আৰু অসমৰ দুখীয়া শিপিনীক তাঁতশাল আৰু সূতা প্ৰদান কৰি সহায় কৰিবলৈ ৰাজ্য চৰকাৰক আহ্বান জনায়। চুতীয়াই ক’লে, "তাঁতশালৰ জৰিয়তে পুৰুষ-মহিলা সকলোৱে স্বাৱলম্বী হ'ব পাৰে।" অনুষ্ঠানত হেমপ্ৰভা চুতীয়া, ৰাজ্যৰ বিভিন্ন স্থানৰ ১০ গৰাকী শিপিনী আৰু হস্ততাঁত আৰু বস্ত্ৰশিল্প প্ৰতিষ্ঠানৰ পৰা সুখ্যাতিৰে উত্তীৰ্ণ ৫ গৰাকী শিক্ষাৰ্থীক সম্বৰ্ধনা জনোৱা হয়। হস্ততাঁত, বস্ত্ৰশিল্প আৰু ৰেচম বিভাগৰ সচিব দিলীপ কুমাৰ বৰাই আদৰণি ভাষণ দিয়া অনুষ্ঠানত, হস্ততাঁত আৰু বস্ত্ৰশিল্প সঞ্চালক পৰাগমণি মহন্তই শলাগৰ শৰাই আগবঢ়াই। অনুষ্ঠানত জিলা পৰ্যায়ৰ বিষয়া আৰু কৰ্মচাৰীসকলে ভাৰ্চুৱেল মাধ্যমেৰে অংশগ্ৰহণ কৰে। অনুষ্ঠানৰ পূৰ্বে, মন্ত্ৰী উৰ্খাও গৌৰা ব্রহ্মই সভাকক্ষৰ বাহিৰত আয়োজিত হস্ততাঁত সামগ্ৰীৰ প্ৰদৰ্শনী উদ্বোধন কৰে।